تساقط قشرة بهتان، حلي كل مشاكل شعرك بماسك قشر البرتقال للشعر

دور الزبادي في ماسك قشر البرتقال للشعر

زمان في الهند كانت الستات بتستخدم بس الزبادي المخفف لغسيل شعرهم من غير أي إضافات تانية، وده كان مخلي شعرهم غامق وطويل وقوي حتى بعد ما يكبروا في السن، وكانوا نادرا ما يشتكوا من مشاكل زي القشرة والحكة في فروة الرأس أو حتى التساقط اللي بقى مرض العصر بتاعنا، وده يعرفنا أد ايه الزبادي ممكن يكون مفيد للشعر.

فوائد الزبادي للشعر

1. بيحتوي الزبادي على إنزيمات بكتيرية نشطة تنضف فروة الراس وتعالج الحكة وقشرة الشعر، كمان بيرطب الشعر ويحبس الزيوت الطبيعية اللي فيه، فيدي الشعر لمعان طبيعي.
2. البروتين الموجود في الزبادي بيحسن صحة شعرك وقوته.
3. بيحتوي الزبادي على حمض اللاكتيك lactic acid اللي بينضف فروة الراس، ويزيل خلايا الجلد الميتة، ويساعد على نمو بصيلات الشعر.
4. له دور فعال في علاج الشعر التالف، والجاف، والباهت، والمجعد.
5. بيساعد في علاج الشعر الخفيف، والضعيف، لأنه بيقوي الجذور وبيساعد بصيلات الشعر في الحصول على التغذية اللي محتاجاها. 
6. بيهدي فروة الرأس من الحكة والالتهابات اللي ممكن تسببها القشرة، واللي بتوصل في بعض الأحيان إنها بتكون حمرا ومتهيجة، فبيلطف ويديكي إحساس فوري بالراحة.
7. الزبادي بيحافظ على مستوى الحموضة عشان يضمنلك شعر صحي وحيوي.
8. بيعالج القشرة: لأنه بيحتوي على خصائص مضادة للفطريات، فبيساعد على تنظيف فروة الرأس بعمق من أي زيوت زيادة  أو أوساخ، “ودي الأسباب الأساسية لتكون القشرة”، فبيخلصك من القشرة ويسيب فروة راسك نضيفة وصحية.
9. بيوازن مستوى حموضة فروة الراس: لو اختل مستوي الحموضة PH في فروة الراس ده هيؤدي لاختلال إفراز الدهون، والنتيجة هتكون شعر باهت بيعاني من القشرة.
10. مفيد في علاج تلف الشعر الناتج عن:

• البيئة (زي الشمس، والهوا الملوث، وتغيير المواسم).
• منتجات الشعر (زي المستخدمة في التلوين، والفرد، وعمل الكيرلز).
• أدوات تصفيف الشعر (زي المكواة، والسيشوار، وفرش الشعر غير الصحية).