ازاي تستخدمي الشامبو في روتين العناية بالشعر المجعد؟

تجنبي أنك تستخدمي كميات كبيرة من الشامبو على شعرك، بدل من كده خففي كمية الشامبو اللي بتستخدميها قبل ما تغسلي شعرك بيه.

ده هيساعدك تقللي استهلاكك من الشامبو عموما وهيجنبك جفاف الشعر.

طرق تانية لتنضيف الشعر في روتين العناية بالشعر المجعد من غير شامبو:

جربي تستخدمي شامبو بدون سلفات في غسيل شعرك، ده هيحافظ على نظافة شعرك من غير ما يسبب الجفاف، كمان جربي تستخدمي طريقة الـ Cowash وهي أنك تغسلي شعرك بالبلسم من غير شامبو، وفي الطريقة دي بتستخدمي البلسم عشان تنظفي شعرك من الأوساخ والزيوت.. بس خلي بالك لو شعرك دهني أو بتروحي الجيم هتحتاجي تغسليه على الأقل مرة في الشهر بالشامبو عشان تتأكدي من نظافته.

البلسم في روتين العناية بالشعر المجعد:

البلسم هو المكون الأساسي المسؤول عن الترطيب في روتين شعرك، لأنه بيرطب الشعر وبيحافظ على شعرك مرطب وصحي وبيقلل من الهيشان اللي ممكن يبوظ اللوك بتاعك.

خلي بالك، لو بدأتي تستخدمي شامبو من غير سلفات، يفضل أنك تستخدمي بلسم خالي من السيليكون، لأن كده هيتراكم السيليكون على شعرك وهيتقل الشعر ويتسبب في تساقطه.

بعد ما تغسلي شعرك قسميه ل 2-3 أجزاء، استخدمي كمية كبيرة من البلسم ووزعيها على طول شعرك من غير ما تقربي من الفروة، وابدأي فكي تشابك الشعر بصوابعك من تحت لفوق وبعدين استخدمي مشط أسنانه واسعه عشان تسرحي شعرك من تحت لفوق.

الليف ان في روتين العناية بالشعر المجعد:

بعد ماتغسلي شعرك، استخدمي ليف ان عشان يحافظ على الترطيب أكتر، ده هيخلي شعرك مرطب من غير ما يتشابك أو يتعقد، وبعد ما تستخدمي الليف ان  اعملي ستايلنج لشعرك بالطريقة اللي بتحبيها.

الماسك في روتين العناية بالشعر المجعد:

الترطيب العميق للشعر عن طريق ماسك مطلوب على الأقل مرة في الأسبوع، ده هيساعد شعرك يحتفظ بالترطيب لمدة أطول، وهيغذيه ويخليه ينمو بصورة أسرع، ودي واحدة من أهم النصايح وانصحك تعملي ماسك الترطيب لشعرك مرة واحدة على الأقل في الأسبوع، وكمان ممكن تستخدمي ماسك جاهز أو تعمليه انتي في البيت حسب اختيارك، وهنا هتلاقي ماسكات للشعر، تقدري كمان تستخدمي أمبولات مرطبة للشعر زي أمبولات ايفا ببروتين الزبادي والصبار ودي أمبولات مرطبة بترطب الشعر وتغذيه وتحافظ على نعومته ولمعانه بتستخدميها مرتين أسبوعيا ومش بتتشطف.

ازاي تنامي بعد ما تعملي روتين ترطيب الشعر المجعد؟

عشان تحافظي على ترطيب شعرك أثناء النوم، حاولي انك تربطي شعرك في شكل الأناناس وتغطيه بكفر من الستان أو تنامي على مخدة من الستان.

ده هيقلل احتكاك شعرك مع بعضه ومع غطاء المخدة القطن وهيقلل من الهيشان.

الزيوت في روتين ترطيب الشعر المجعد:

الشعر اللي في أطراف شعرك هو الأضعف والمعرض اكتر للتقصف والجفاف.

استخدمي زيت خفيف زي الجوجوبا أو سيرم خالي من السيليكون عشان ترطبي أطراف شعرك كل يوم أو كل يومين.

الحرارة مش في روتين ترطيب الشعر المجعد:

الحرارة بتضر كل أنواع الشعر، لكن الشعر المجعد بيكون الضرر فيه أكتر من أي نوع تاني.

لو هتستخدمي الحرارة لشعرك، استخدميها على أقل درجة ممكنة ومتنسيش تستخدمي منتج بيحمي من الحرارة عشان يقلل الضرر اللي على شعرك قدر الإمكان، وممكن تهتمي بأكلك علشان يساعد شعرك يبقى أقوى.

شرب المياه في روتين ترطيب الشعر المجعد:

شعرك عمره ما هيكون مرطب بالدرجة الكافية لو مش بتشربي مياه كتير.

التزمي بشرب ما يقل عن 3 لتر من المياه يوميا على الأقل عشان تحافظي على ترطيب وصحة شعرك.

هيظهر على شعرك نتيجة روتين ترطيب الشعر المجعد امتى؟

اصبري على شعرك، و متستعجليش أبداً على النتيجة.

أي علاج أو روتين للشعر محتاجه تستمري عليه على الأقل 3 شهور عشان تلاقي نتيجة ملحوظة وواضحة.

فبلاش تزهقي في النص، أو تتوقعي نتيجة سريعة، التزمي بخطوات الروتين وخليها جزء من حياتك عشان تلاقي نتيجة ترضيكي.