8 خطوات مهمة في روتين العناية بالشعر الدهني

ازاي تنضفي شعرك من غير ما تغسليه تاني؟

الشعر الدهني بيفرز زيوت كتير، ده بيخليه بيحتاج للغسيل باستمرار، لكن غسيل الشعر في روتين العناية بالشعر هيدي نتيجة عكسية، وهيخليه يزود إنتاجه من الدهون والزيوت، عشان كده ممكن تستخدمي الشامبو الجاف (Dry Shampoo) في الأيام اللي مش هتغسلي فيها شعرك.

الشامبو الجاف Dry Shampoo هيساعدك تحافظي على فروة راسك نضيفه، ويقلل من المظهر الدهني لشعرك، من غير ما ينشفه أو يسببله جفاف، لكن ده مش معناه أنك متغسليش شعرك أو تستخدمي الشامبو الجاف Dry Shampoo أكتر من اللازم، بالعكس حاولي توازني بين الحاجتين عشان توصلي لأفضل نتيجة لشعرك.

البلسم في روتين العناية بالشعر الدهني:

البلسم بيطري الشعر، وبيديه لمعان وصحة، فاختاري البلسم المناسب لشعرك الدهني، لكن ما تخليش البلسم ييجي على فروة شعرك، لأنه هيخلي فروة شعرك دهنية أكتر وممكن يطلعلك قشرة دهنية، عشان كده استخدمي البلسم على أطراف شعرك بس وابعديه تماما عن الفروة.

خل التفاح في روتين العناية بالشعر الدهني:

المياه السخنة ممكن تسبب الجفاف الشديد لشعرك، خل التفاح ممكن يكون حمضي بالدرجة الكافية عشان يحافظ على توازن درجة الحموضة في شعرك، ويخلصه من تراكمات المنتجات المختلفة.

الخطوات

1. ضيفي معلقتين أو 3 معالق من خل التفاح لكوباية كبيرة من المياه.
2. بعد ما تاخدي شاور، اشطفي شعرك الشطفة الأخيرة بخليط خل التفاح.
3. استخدميه على الجذور وبعدين اشطفيه بالمياه الفاترة.

خل التفاح هيشيل الدهون المتراكمة وهيخلي شعرك ناعم وصحي.

ايه المنتجات الأساسية في روتين العناية بالشعر الدهني؟

الشعر الدهني بينتج بالفعل زيوت كتير، استخدام منتجات كتير للعناية بالشعر أو للتصفيف ممكن تسبب تراكم للمنتجات دي على الفروة وبالتالي تزود إنتاجها من الزيوت، عشان كده بلاش تخلي فيه خطوات ومنتجات كتير في روتينك، يعني ممكن تعملي ماسكات كل فترة يرطب شعرك وينف الفروة من أي أتربة ويكون ماسك بمكونات طبيعية، فخلي روتين ترطيب الشعر الدهني بسيط وبمنتجات أساسيه بس قدر الإمكان.

شامبو كلارفينيج في روتين العناية بالشعر الدهني:

من وقت للتاني، مهم أنك تستخدمي شامبو كلارفينيج Clarifying Shampoo عشان ينضف شعرك من أي بواقي للزيوت أو المنتجات.

الشامبو الكلارفينيج Clarifying Shampoo ممكن يكون شامبو فيه سلفات ضعيفة، عشان تضمني تنضيف شعرك بالصورة الكافية.

المقشر في روتين العناية بالشعر الدهني:

التقشير بيحافظ على فروة رأسك نضيفة ومفيهاش قشرة، عشان كده مهم لو شعرك دهني تستخدمي مقشر لفروة رأسك من وقت للتاني، وكمان التقشير هيشيل أي تراكمات وزيوت زايدة عندك، وهيخلي فروة راسك نضيفة باستمرار، ممكن تستخدمي المقشر مرة أو مرتين في الأسبوع، وممكن كمان يكون مقشر طبيعي من السكر الناعم.، افركي فروة رأسك باستخدام المقشر في حركات دائرية بعد ماتغسلي شعرك، عشان تتأكدي أن فروة رأسك نضيفة تمام ومفيش فيها أي تراكمات للدهون أو القشرة.

الحرارة هتبوظلك روتين العناية بالشعر الدهني:

استخدام السشوار باستمرار عشان تجففي بيه شعرك ممكن يزود إنتاج الدهون والزيوت من فروة رأسك، عشان كده حاولي تسيبي شعرك ينشف في الهوا بدل ما تنشفيه بالسشوار كل مرة تغسليه فيها، وممكن كمان تستخدمي سيرم Serum أو ليف إن Leave in خفيف على أطراف شعرك عشان يقلل هيشانه أما ينشف ويخليه بيلمع وصحي أكتر.