روتين العناية بالبشرة الدهنية والمختلطة-اتخلصي من الجلد الميت

ازاي اختار مقشر في روتين البشرة الدهنية أوالمختلطة ؟

المقشر في سكين كير روتين للبشره الدهنية عموما له وظيفة واحدة، وهو التخلص من الجلد الميت وزيادة معدل تجدد خلايا البشرة.

مهم تعرفي طريقة عمل كل مقشر عشان تختار النوع المناسب لبشرتك.

في نوعين من المقشرات

مقشر فيزيائي

• هي المقشرات اللي بتحتوي على حبيبات صغيرة فيها، دي بتعمل تقشير للبشرة عن طريق فرك الجلد بالحبيبات دي.
• حركة الفرك دي هي اللي بتشيل خلايا البشرة الميتة وبتقشرها.
• يفضل لو هتستخدمي مقشر فيزيائي تستخدمي مقشر تكون حبيباته صغيرة مش كبيرة.
• ده لأنه الحبيبات الكبيرة بتحتك جامد بالبشرة وبتعمل فيها زي جروح صغيرة مش بنقدر نشوفها بعينينا وده بيضر حاجز الجلد جدا على المدى الطويل.

مقشر كيميائي

المقشرات الكيميائية عبارة عن أحماض بتقشر البشرة من غير أي فرك، لكن بتقشرها عن طريق أنها بتكسر الروابط اللي بين خلايا الجلد الميت وبتساعد في التخلص منه.

في منها 3 أنواع:

• AHAs (أحماض ألفا هيدروكسي) زي حمض الجليكوليك Glycolic Acid وحمض اللاكتيك Lactic Acid.
• BHAs (أحماض بيتا هيدروكسي) زي  حمض الساليسيليك Salicylic Acid.
• أنزيمات الفاكهة.

اختاري المقشر حسب نوع بشرتك وطبيعة مشكلتها، لو بشرتك دهنية ومعرضة للحبوب فالمقشر الكيميائي هيكون الأنسب ليها وممكن تدخليه روتين البشرة الدهنية بتاعك.

ده لأن المقشر الفيزيائي هيسبب احتكاك مع بشرتك، وده ممكن يخليها تلتهب أكتر ويخلي الحبوب تتنقل بسهولة من مكان للتاني.

لو بشرتك دهنية وحساسة اختاري المقشرات اللي فيها حمض اللاكتيك Lactic Acid لأنه الألطف والأخف على البشرة.

ازاي استخدم المقشر في روتين البشرة المختلطة أو الدهنية ؟

لو هتستخدمي مقشر فيزيائي

1.  فابدأي وزعي كمية صغيرة على بشرة نضيفة ورطبة.
2. دلكي بشرتك بحركات دائرية وخفيفة من غير ماتكوني قاسية على بشرتك عشان متجرحيش الجلد بجروح صغيرة.

لو هتستخدمي مقشر كيميائي

1. ابدأي وزعي طبقة رقيقة من المقشر على بشرتك.
2. سيبيه على بشرتك لمدة من 10-15 دقيقة، أو حسب ما موضح على المنتج.
3. تجنبي انك تسيبي المقشر على بشرتك لفترة أكتر من اللازم لأ،ه ممكن في الحالة ده يسبب لك حروق أو التهابات.
4. افركي المقشر أو اغسليه من على بشرتك، حسب التعليمات المناسبة لكل منتج.

نقطة مهمة ضروري تاخدي بالك منها لما تدخلي المقشر في روتين البشرة المختلطة أو الدهنية بتاعك:

• عادة التقشير بيكون مطلوب للبشرة من مرة لمرتين أسبوعيا باستخدام مقشر لطيف.
• استخدام المقشر في روتين البشرة المختلطة أو الدهنية مش قاعدة ثابتة، لأن بشرتنا بتتفاعل مع التقشير بطريقة مختلفة من حد للتاني.
• دايما حاولي تسمعي بشرتك، بمعنى لو لقيتي أن التقشير بيخلي بشرتك ملتهبة أو جافة أو بيخلي يظهر فيها حبوب فحاولي تغيري نوع المقشر لانه ممكن يكون قاسي عليها.
• ممكن كمان تقللي عدد مرات التقشير عشان تقوي حاجز البشرة شوية.
• التقشير بصورة زايدة عن المطلوب هيخلي بشرتك تجف وهيضعف من حاجز البشرة اللي بيحميها من عوامل ضارة كتير.

خطوة مهمة جدا في روتين البشرة الدهنية بعد استخدام المقشر :

افضل روتين للبشرة الدهنية بيكون أساسي فيه الترطيب، ومهم جدا ترطبي بشرتك بعد عملية التقشير، عشان تقوي حاجز البشرة وتتجنبي ظهور أي قشور على سطح البشرة.

استخدمي مرطب مناسب لنوع بشرتك، يفضل يكون في صورة جل أو لوشن، لأنه مناسب أكتر للبشرة الدهنية والمختلطة، ده لأن قوامه بيساعده يرطب البشرة بعمق من غير مايسبب أي إفرازات زيادة من الدهون.