معلومات هتفرق 180 درجة في ترطيب الشعر العادي المموج والمستقيم

جسمك بشكل طبيعي بيوصل الغذا لشعرك زي ما بيوصله لأي عضو تاني في الجسم، وفيه كمان غدد دهنية مسؤولة عن إنها ترطب جسمك كله وكذلك شعرك، وده عن طريق المادة الزيتية اللي بتفزرها الغدد دي في فروة راسك واللي بيطلق عليها اسم “الزهم”.

درجة وكمية إنتاج المادة دي هي اللي بتفرق في طبيعة الشعر، بمعنى إنه لو إنتاج المادة دي زاد عن الطبيعي الشعر بيكون شعر دهني، أما لو إنتاج الزهم قل عن المعدل الطبيعي بينتج عنه الشعر الجاف، لكن لو إنتاج الزيوت متوازن بيكون شعرك عادي.

ازاي تتأكدي إن شعرك عادي؟

لو طبيعة شعرك عادي فانتي محظوظة بيه لأنه وَسط بين الشعر الدهني وبين الشعر الجاف، وزي ماقولنا مستوى إنتاج الدهون فيه متوازن وده بيخلي ملمسه طول الوقت ناعم وسهل تفكي التشابك اللي فيه سهل وشكله دايماً بيلمع وجميل وكمان أقل عُرضة لمشاكل الشعر، لكن مع العوامل البيئية في مصر ووطنا العربي، الشعر العادي بيعاني من مشاكل الشعر اللي بتخلي ترطيبه الطبيعي مش بالشكل المثالي.

ليه الشعر العادي بيحتاج ترطيب؟

شعر باهت، شعر متكسر، شعر متساقط.. دي كلها وأكتر مشاكل بتحصل لشعرك لو مش بتحافظي على ترطيبه (بالشكل المناسب اللي هنوضحهولك بالتفصيل).

ازاي ترطبي الشعر العادي المستقيم والمموج؟

الشعر العادي بيحتاج ترطيب على حسب وضعه الحالي بمعنى إنه لو فيه فترة بقى أقرب للجاف هيحتاج ترطيب بمنتجات تقيلة والعكس لو في فترة بقى أقرب للدهني.
فمهم تخلي بالك إن فروة راسك إفرازها للدهون متوازن، ولو رطبتيه بشكل غير مناسب هيحصل لشعرك المشاكل اللي بتحصل للشعر الدهني زي إنه يفضل طول الوقت مزيت وفيه دهون زيادة ومش مديه لشعرك الكثافة المناسبة ، ومشاكل الشعر الجاف زي الهيشان والتقصف.

لو شعرك عادي محتاجة ترطبيه يوم في الأسبوع وتضيفي المرطب على أطراف شعرك وتطلعي بيه لنص الشعراية بس ومش محتاجة ترطبي فروة راسك إلا لو كانت شديدة الجفاف.
ملحوظة: خلي بالك إن ترطيب الشعر وهو مبلول بشكل نسبي بعد غسيله بيساعد شعرك يمتص المرطب أسرع.

يعني إيه شعر مبلول بشكل نسبي؟

من أهم الخطوات اللي لازم تعمليها عشان تحافظي على شعرك هي إنك بعد الاستحمام تجففيه عن طريق إنك تلفي عليه فوطة قطن أو ميكروفايبر ومن غير فرك في فروة الراس، بإيدك الاتنين واضغطي على شعرك بالفوطة بس، هيكون فيه درجة بسيطة من الرطوبة اللي في المياه، هنا تقدري تضيفي المرطب.

ملحوظة: غلط تسيبي شعرك مبلول بعد الاستحمام خصوصاً لو هتعرضيه لهواء بشكل طبيعي لان مسام شعرك بتكون مفتوحة وممكن يتكون بكتيريا على فروة راسك وتمتصها بسهولة وبلاش تستخدمي مجفف الشعر ولو قررتي تستخدميه مهم تحطي على شعرك منتج من منتجات الحماية الأول.

لو شعرك متوزان ازاي تحافظي على ترطيبه؟

أهم حاجة تختاري منتجات مناسبة لطبيعة شعرك ومن أهم المنتجات دي هي الشامبو والمرطب، الشامبو لأنه من أكتر المنتجات اللي بشكل روتيني هتبقي بتستخدميها، والمرطب لأنه زي ما قولنا لو مش مناسب لطبيعة شعرك واللي محتاجه هيعرضه لمشاكل الشعر الدهني أو الجاف.

ازاي تختاري شامبو مناسب للشعر العادي؟

مهم تختاري شامبو يكون مرطب، بيحتوي في مكوناته على بيتينو أحماض أمينية، وخلي بالك من طريقة استخدامك ليه، بتضيفيه على كف إيدك قبل الغسيل وبتغسلي بيه فروة راسك عن طريق إنك بتدلكيها بأطراف صوابعك مش ضوافرك عشان متضريش فروة راسك، وعلى باقي أطراف شعرك بتستخدمي البلسم.

ازاي تختاري مرطب مناسب للشعر العادي؟

مهم يكون في مكوناته واحد من منتجات الزيوت والنخاع، لكن الأهم إنك تحافظي على خطوات الترطيب بالطريقة المناسبة اللي قولناها عشان تحافظي على شعرك وميحصلش انسداد للمسام ولا تراكم للزيوت في فروة الشعر وباقي المشاكل الخاصة بفروة الراس والشعر.

هل خصلة الشعر المستقيم أو المموج هتفرق في طريقة أو درجة الترطيب؟

الترطيب في الطبيعي بيحصل لما الزيوت الطبيعية تتنقل من فروة الرس لحد أطراف الشعر وهنا بيظهر الاختلاف والفرق بين خصلات الشعر المختلفة، بمعنى إن الشعر المجعد هو الأصعب و الأبطأ في الترطيب لأنه الزيوت بتاخد وقت طويل عشان تتحرك بين التفافات الشعر، وأسرع منه بدرجة الشعر الكيرلي، بعده المموج وبعده المستقيم عشان كده لو شعرك عادي وخصلته مموج أو مستقيم فانتي شعرك تقريباً في حالته المثالية بالنسبة للترطيب، مهم بس تهتمي بالأكل الصحي والأطعمة اللي بتغذي الشعر وتحافظ على صحته وترطيبه لأن ده هيساعدك تظهري دايماً بشكل حيوي وجميل.

هو لو محجبة هيفرق في درجة ترطيب شعري؟

الحجاب بيقلل التهوية فمينفعش مثلاً تلبسي الطرحة عليه وهو مبلول، لكن في نفس الوقت تغطيتك لشعرك بشكل عام بتحمي شعرك من إنه يتعرض لآشعة الشمس بشكل مباشر وبتحميه من الأتربة، لكن خلي بالك من الأفضل تختاري ألوان تعكس درجة الحرارة زي الأبيض والألوان الفاتحة، وفي نفس الوقت بلاش البندانة القطن طول الوقت لأنها بتمتص الترطيب أسرع من الستان.

البيض

البيض مش مجرد مفيد للشعر لأ ده يعتبر كنز لأنه غني بأهم العناصر الغذائية اللي بيحتاجها الشعر زي البروتين اللي في الأصل الشعر بيتكون منه، والبيوتين اللي بينتج الكيراتين المغذي للشعر وكمان بيحتوي على السيلينيوم والزنك المفيدين للجسم واللي بيساعدوا شعرك ينمو بشكل صحي.

التوت

من الأكلات اللي مش مشهورة إنها مفيدة لصحة الشعر بالرغم من إنه فيه فوايد كبيرة جداً وبتساعد الشعر بشكل مكثف لأنه غني بفيتامين ج اللي خصائص مضادات الأكسدة واللي بدورها بتحمي بصيلات الشعر من التلف، وغني كمان بفيتامين سي اللي بينتج الكولاجين المسؤول عن حماية شعرك من التقصف، بالإضافة لإنه بيساعد جسمك يمتص الحديد اللي بيحمي شعرك من تساقط الشعر.

السبانخ

من أهم المواد والعناصر الغذائية اللي بيحتاجها الشعر هي الحديد لأنه بيساعد خلايا الدم الحمراء إنها توصل الأكسجين والغذاء للشعر، والسبانخ هي كنز للحديد ولعناصر غذائية وفيتامينات زي حمض الفوليك وفيتامين سي Vitamin C و فيتامين أ Vitamin A

سمك دهني

الأسماك الدهنية غنية بأحماض أوميجا 3 اللي بتقوي الشعر وبتعالجه من التساقط، وغنية بالبروتين وفيتامين د Vitamin D والسلينيوم اللي بيساعدوا شعرك ينمو بشكل صحي. الأسماك الدهنية دي زي سمك الماكريل والرنجة وسمك السلمون.

الأفوكادو

الأفوكادو غني بالدهون الصحية اللي بتغذي الشعر من جذوره وبتخليه ينمو بشكل صحي وغني كمان بمضادات الأكسدة وفيتامين إي Vitamin E وفيتامين سي Vitamin C اللي بيعالجوا فروة الراس وبيحموا الشعر من التساقط، عشان كده بتلاقي الأفوكادو مشهور في الوصفات ومكونات المنتجات اللي ليها علاقة بالجمال عموماً سواء العناية بالبشرة أو العناية بالشعر.

اللوز

المكسرات عموماً من الأكلات اللذيذة والغنية بالعناصر الغذائية المفيدة للجسم. وبالتحديد اللوز من أكتر المكسرات المفيدة لصحة الشعر لأنه فيه فيتامينات زي فيتامين هـ Vitamin E وفيتامينات ب VitaminB والزنك والأحماض الدهنية الأساسية اللي بتحمي الشعر من التساقط وبتقوي شعرك و بتعزز نمو الشعر. من هنا تقدري تعرفي أكتر 20 أكلة بتعالج شعرك من التساقط

الفلفل الحلو

الفلفل الحلو من أكتر الأكلات الغنية بفيتامين سي Vitamin C ، وفيتامين سي Vitamin C مفيد للشعر لأنه بيساعد على امتصاص الحديد وزي ما قولنا إنه بينتج الكولاجين و بيساعد الدم يوصل الأكسجين والغذا للجسم والشعر، لو جه في بالك دلوقتي طالما فيتامين سي Vitamin C من أكتر الفيتامينات المفيدة للشعر فأكيد البرتقال هو الحل المباشر، في الحقيقة البرتقال بالتأكيد غني بفيتامين سي Vitamin C لكن الفلفل الحلو حبة واحدة منه بتعادل 5.5 ضعف الفيتامين سي Vitamin C الموجود في حبة البرتقال.

الجمبري

بالرغم من اإن الجمبري فيه نسبة دهون قليلة لكن فيه كمية مناسبة من أحماض اوميجا 3 اللي بتساعد شعرك يبقى أقوي وغني كمان بفيتاميانات وأحماض مهمين جداً لتغذية الشعر وحمايته من التساقط زي فيتامين ب Vitamin B والزنك والحديد وفيتامين د Vitamin D.

5 نصايح للعناية بصحة وترطيب الشعر العادي المموج والمستقيم

اختاري منتجات مناسبة لطبيعة شعرك ومناسبة بردو لخصلة شعرك خصوصاً الشامبو والمرطب زي ما وضحنا فوق بالتفصيل.

نامي على مخدة حرير أو ستان بدل المخدة القطن لأن القطن بيعمل زي السفنجة وبيمتص المرطب الموجود في شعرك وكمان المخدة الستان بتحمي شعرك من إنه يتكسر أثناء نومك.

حاولي تقللي استخدام المكواة ومجفف الشعر على شعرك بحيث تكون من مرة لـ 3 مرات بحد أقصى في الأسبوع لأن درجة الحرارة العالية اللي بيخرجوها بتشيل أو بتقلل المرطب الطبيعي الموجود في فروة الراس،

متعرضيش شعرك لآشعة الشمس المباشرة لفترة طويلة عشان ميتعرضش للجفاف والبسي كاب على شعرك أو استخدمي شمسية خصوصاً في الوقت من 10 الصبح لـ 2 بعد الضهر.

قللي استخدام الصبغات بحيث تبقى المدة بين الصبغة والتانية مش أقل من 6 لـ 8 أسابيع وده لأنها بتضف الشعر وبتخليه جاف وهايش ولو مضطرة تستخدمي الصبغة تكون على فترات متباعدة وتحاولي تختاريها بعناية ومتدوريش على الصبغة الأقل في السعر.