مشاكل البشره الدهنيه

سؤال من: اميرة

425

أكتوبر 4, 2023

السؤال

عن: آثار الحبوب

بشرتي دهنيه وعندي آثار حبوب وحفر في الوش ايه العلاج الجذري للحفر والحبوب حتي لو مش كريم

الاجابة:

أجاب عن السؤال:

Duaa Adam

أهلاً بيكي، البشرة الدهنية من أنواع البشرة الأكثر عرضة لحب الشباب بسبب دهنيتها الزائدة وقابليتها لإنسداد المسام وبالتالي تكوين الحبوب. بعض أنواع الحبوب بتسيب وراها أثر سواء كان في شكل تصبغات أو في شكل ندوب أو حفر في البشرة.

علاج الندوب والحفر بيبتدي بالحرص على معالجة الحبوب الحالية النشطة، لأن مفيش فايدة من علاج الندوب أثناء وجود حبوب هي كمان حتسيب ندوب جديدة عشان كده الخطوة الأولى هي علاج الحبوب الحالية، بنوصيكي تراجعي طبيب جلدية عشان يكتبلك العلاج المناسب ليكي لأن جزء من الحبوب اللي بتسيب ندوب بتحتاج علاجات طبية بيكتبها ليكي الدكتور.

أما بالنسبة لخيارات علاج الندوب، بتختلف على حسب نوع الندوب اللي عندك وعلى أساسها بيحددلك الدكتور نوع الإجراء الطبي المناسب لنوع حالتك. أغلب الناس بيكون عندها أنواع ندوب مختلفة في نفس الوقت عشان كده الخطة العلاجية بتتكون من مزيج من الإجراءات الطبية اللي ممكن تتضمن:

جلسات العلاج بالحقن – Microneedling.
جلسات التقشير الكيميائي.
جلسات تقطيع الألياف – Subcision.
جلسات الليزر.

ومن المهم تتجنبي إنك تحاولي تفقعي الحبوب أو تلعبي بيها بإيدك لأن ده بيساهم في تكون الندوب. للأسف العلاجات الموضعية والكريمات مش فعالة في حالة الندوب لكن الجلسات الطبية اللي ذكرناها بتساهم في تخفيف مظهر الندوب بشكل كبير.