روتين العناية بالبشرة الحساسة هيعالجلك التهاب وحساسية بشرتك

الغسول في روتين العناية بالبشرة الحساسة:

• أي روتين للبشرة بيبدأ بالغسول، لأن البشرة النظيفة الخالية من الأتربة والأوساخ هيا بشرة صحية.
• مثال بسيط عشان يوضحلك أهمية الغسول، لو استخدمتي أغلى منتجات في العالم، وأفضل سيروم للبشرة، كل ده على بشرة مش نظيفة، مش هتعرفي تستفيدي بأي مكون من مكونات المنتجات دي إلا لما تنضفي مسام بشرتك.
• لو بشرتك حساسة، اختاري دايما غسول يكون لطيف على البشرة، ميكونش فيه عطور او كحول، ويكون فيه مواد ملطفة ومرطبة للبشرة زي مثلا جل الصبار Aloe Vera Gel أو حمض الهيالورونيك Hyaluronic acid.
• استخدمي الغسول على بشرتك في حركات دائرية لمدة 30 ثانية وبعدين اغسليه كويس بالمياه الفاترة.

التونر في روتين العناية بالبشرة الحساسة:

• التونر Toner بيعادل درجة حامضية بشرتك الـ PH، بعد ما بتغسلي بشرتك بالغسول.
• أغلب غسولات البشرة دلوقتي بتراعي الـ PH الخاصة بالبشرة في تركيبها وعشان كده خطوة التونر مش خطوة أساسية أوي في الروتين عموما.
• لو هتستخدمي التونر، اختاري دايما تونر خالي من الكحول ومن العطور ومن المكونات اللي ممكن تسبب التهاب بشرتك.
• اختاري تونر فيه مكونات مهدئة للبشرة زي الـ Sodium Hyaluronate الهيالورينات، أو النياسيناميد Niacinamide.

السيروم في روتين العناية بالبشرة الحساسة:

• السيروم وظيفته الأساسية هو علاج مشكلة موجودة بالفعل في البشرة.
• مشاكل البشرة اللي بتكون زي: التجاعيد والخطوط الرفيعة والبقع الغامقة والاحمرار وغيرها كتير.
• لو بشرتك حساسة حاولي تختاري سيروم يكون خالي من العطور، في مكونات مهدئة للبشرة بتحافظ على مستويات الترطيب فيها من غير ما تسبب أي التهاب أو احمرار.
• ممكن تستخدمي سيروم فيشي الهيالورونيك أسيد Mineral 89، لأنه بيحتوي على الهيالورونيك Hyaluronic والمياه الحرارية اللي هترطب بشرتك وتهديها وتقلل احمرارها.

الترطيب في روتين العناية بالبشرة الحساسة:

• استخدمي مرطب مناسب لنوع بشرتك، خالي من العطور والكحول، في صورة كريم جل أو جل عشان ميسدش مسام بشرتك ويسببلك حبوب.
• اختاري دايما المرطبات اللي مكتوب عليها non-comedogenic أو لا تسبب انسداد المسام. 
• استخدمي المرطب على بشرتك وهيا رطبة شوية عشان تستفيدي بيه أكبر استفادة ممكنة، وعشان كمان تقللي احمرار وتهيج بشرتك.

الصن بلوك في روتين العناية بالبشرة الحساسة:

• المنتج الأساسي اللي بشرتك متقدرش تستغنى عنه.
• الصن بلوك مش بس بيحميكي من الاسمرار اللي بيحصل نتيجة أشعة الشمس، لكن كمان بيحميكي من سرطان الجلد والخطوط الرفيعة وعلامات تقدم السن اللي بتظهر في البشرة.
• اختاري صن بلوك مناسب لبشرتك الحساسة، خالي من العطور والكحول والبارابين، بمعامل حماية SPF ميقلش عن 30+.
• اتاكدي أن الصن بلوك بيحميكي من نوعين من الأشعة فوق البنفسجية الضارة وهما UVA و UVB.

ازاي تتجنبي اي تفاعلات خارجية مع بشرتك الحساسة؟

 البشرة الحساسة بتتفاعل بطريقة سلبية مع الحرارة، لأن الحرارة بتسبب تكسير الدهون في الجلد وده بيضعف حاجز البشرة.

عشان كده الشاور السخن الطويل مش هيكون أفضل اختيار لطبيعة بشرتك.

حاولي تتجنبي الشاور السخن قدر الإمكان، وبدليه بمياة فاترة أو باردة في فصل الصيف عشان تحمي بشرتك من الآثار السلبية للحرارة.