روتين العناية بالبشرة الدهنية في فترة المراهقة

 خطوة التونر مش خطوة أساسية في روتين العناية بالبشرة الدهنية اليومي، خصوصا في فترة المراهقة.

التونر في الأساس كان بيستخدم زمان عشان يعادل الـ PH الخاصة بالبشرة واللي كان بيبوظها الصابون.

دلوقتي أغلب غسولات البشرة بتتعمل بـ PH مناسبة للبشرة فبالتالي خطوة التونر بقت مش أساسية.

ممكن تستخدمي التونر كعامل مساعد على روتينك لعلاج الحبوب، بأنك تختاري تونر بمكونات بتساعد في علاج الحبوب زي حمض الجليكوليك Glycolic acid أو أحماض الـ AHA و الـ BHA عموما.

لو بشرتك حساسة، ابعدي تماما عن أي تونر فيه كحول أو فيه مواد معطرة لأنه هيسبب حساسية والتهاب لبشرتك.

ممكن كمان تستخدمي تونر في مكونات مرطبة للبشرة زي الهيالورونيك Hyaluronic لو حسيتي بشرتك محتاجه ترطيب.

حب الشباب ممكن يحصل في أي سن، لكنه مشهور أكتر في فترة المراهقة عشان التغيرات الهرمونية.

استخدمي الكريم أو السيرم المعالج لحب الشباب تاني خطوة في روتينك بعد الغسول.

استخدمي واقي من أشعة الشمس واسع المفعول بمعامل حماية 30 أو أكتر.

اتاكدي أن الصن بلوك اللي هتختاريه بيحمي من أشعة الشمس  UVA و UVB.

اختاري الصن بلوك في صورة جل أو سائل Fluid لو بشرتك دهنية أو مختلطة وجدديه كل ساعتين.

استخدمي المرطب مرتين يوميا عشان تحافظي على نضارة بشرتك وتمنعي الخطوط الرفيعة والتجاعيد.

استخدمي مرطب خفيف في صورة جل خالي من الزيوت لو بشرتك دهنية عشان مايسدش مسام بشرتك.

ممكن كمان تختاري مرطب بيحتوي على نسبة حماية من الشمس SPF عشان يحمي بشرتك أكتر من أشعة الشمس.

لو بشرتك حساسه، ابعدي عن المرطبات اللي بتحتوي على عطور أو كحول.

زي بشرتك بالظبط، شفايفك كمان بتحتاج للعناية.

استخدمي مرطب شفايف قوي كل يوم الصبح ويفضل يكون فيه معامل حماية من الشمس SPF.

متنسيش تهتمي بايدك في روتينك اليومي.

استخدمي كريم للايد الصبح وبليل عشان تحافظي على ترطيب ايدك وتتجنبي جفافها.

دايما اتاكدي أن ايدك نظيفة قبل ما تلمسي بشرتك أو قبل ما تستخدمي ايدك عشان توزعي أي منتج على بشرتك.

لو ايدك مش نظيفة، ده هيتسبب أنها تنشر البكتيريا في بشرتك وده ممكن يسبب ظهور الحبوب.

لو بتستخدمي ميك أب يومي، لازم تتأكدي أن بشرتك نظيفة تماما منه قبل النوم.

استخدمي مزيل للميك اب مناسب لنوع بشرتك.

بلاش تكتفي بالغسول بس عشان تتخلصي من الميك أب لأنه مش بيقدر يتغلغل جوه المسام وينضفها كويس زي مزيل الميك اب وده هيتسبب في تراكم المنتجات على البشرة وظهور الحبوب.

تغذية البشرة بتيجي من الأساس من جوه الجسم، عشان كده مهم جدا وكجزء من روتينك اليومي تحافظ على تناول أطعمة صحية ومفيدة.

ابعدي تماما عن الأطعمة الدهنية والسكريات لأنها ممكن تزود الحبوب في بشرتك.

حاولي كمان تقللي من منتجات الألبان زي الحليب كامل الدسم وغيرها، بدليهم بالمنتجات النباتية زي حليب اللوز أو المكسرات.