الروتين اليومي للعناية بالبشرة الدهنية

التونر موجود في الروتين اليومي للبشرة الدهنية:

• وظيفة التونر هو انه يشيل أي بواقي من تراكمات الجلد والأتربة في البشرة وكمان بيعادل درجة حموضتها.
• التونر الكويس هيعالج بشرتك الدهنية واللمعان من غير ما يسبب جفافها. 
• عشان كده يفضل تستعملي نوع تونر ينقي بشرتك ويضيق المسام، وفي نفس الوقت يكون بيحافظ على توازن الترطيب فيها.
• لو عندك مشاكل تانية زي وجود تصبغات وبقع، ممكن تستعملي تونر متعدد الاستخدامات، هيقوم بوظايف كتير (زي التنضيف، التفتيح، الترطيب) في نفس الوقت.

ايه الطريقة الصح لاستعمال التونر في الروتين اليومي للبشرة الدهنية؟

1. بعد الغسول رشي التونر على بشرتك، أو استخدمي قطمة مبلولة بيه.
2. دلكي بشرتك بالقطنة بحركات دائرية، . 
3. امسحي دقنك ورقبتك بالتونر ويفضل تبتدي من تحت الدقن على طول.
4. ابعدي عن محيط العينين، عشان ميحصلهاش تهيج.

السيروم في الروتين اليومي للبشرة الدهنية:

• السيروم يعتبر خطوة مهمة في روتين بشرتك لكن مش أساسية، ده لأنه بيغذي بشرتك بكل المكونات المهمة لنضارتها زي مضادات الأكسدة، الفيتامينات، والببتيدات (البروتينات) وغيرها.
• ميزة السيروم إنه بيكون مصنوع بوسط مائي، فامتصاصه بيكون سريع وبيوصل لطبقات جلدك بفعالية عشان توصلي لأعلى استفادة من مكوناته.
• كقاعدة عامة، بنستعمل السيروم بعد الغسول وقبل المرطب، لأن المرطب بيساعد على استفادة أكبر من مكونات السيروم.

ليه تستخدمي السيروم؟

في أسباب كتير عشان تبأدي تزودي السيروم في روتينك اليومي

1. أنه خفيف على البشرة، لأنه في وسط مائي فمش بتحسي انك حاطة حاجة تقيلة على بشرتك.
2. الجلد بيشربه بسرعة، على عكس الزيوت والكريمات اللي بتاخد وقت طويل في امتصاصها.
3. مش بيسد المسام، خصوصًا لو خالي من السيليكون.
4. له وظايف كتير، مهما كان نوع المشاكل في بشرتك، هتلاقي نوع سيرم بيقدر يتعامل مع المشاكل دي.

ايه الطريقة الصح لاستعمال السيروم في الروتين اليومي للبشرة الدهنية؟

أنواع السيروم بتختلف حسب مادتها الفعالة، و بناء على المادة دي بنحدد معاد استخدامها سواء الصبح أو بليل.

لكن في طريقة عامة عشان تستفيد بشرتك بالسيروم بصورة كاملة:

1. اغسلي بشرتك كويس بالغسول المناسب لنوعها.
2. ابدأي أنك تحطي السيروم على أطراف صوابعك ووزعيه على بشرتك من فوق لتحت.
3. دلكي السيرم على بشرتك لمدة 60 ثانية عشان تتأكدي أنه تم امتصاصه تمامًا.
4. آخر خطوة، استخدم مرطب مناسب لنوع بشرتك.

المرطب أساسي في الروتين اليومي للبشرة الدهنية:

اختاري دايمًا مرطب في صورة لوشن أو جيل، المرطبات اللي بتكون في صورة كريم مش هتناسب بشرتك الدهنية، لأنها ممكن تسد المسام وتزود من لمعان البشرة.

لو بشرتك حساسة، حاولي تستعملي مرطب له خصائص تلطيفية عشان يساعدك تقللي تهيج بشرتك.

ايه الطريقة الصح لاستعمال المرطب في الروتين اليومي للبشرة الدهنية؟

1. على بشرة مندية، استعملي صوابعك لتوزيع المرطب على المناطق الرئيسية اللي محتاجة ترطيب في بشرتك.
2. ابتدي وزّعي المرطب في حركة دائرية في اتجاه من جوة لبرة، ومن عند الدقن للجبهة.
3. سيبي فاصل  دقيقة أو دقيقتين بعد توزيع المرطب قبل ما تبتدي في باقي الخطوات، عشان تضمني امتصاصه.

دور واقي الشمس في الروتين اليومي للبشرة الدهنية:

• آخر خطوة في روتينك الصباحي هي استخدام واقي شمس مناسب. 
• واقي الشمس هيحمي بشرتك من الأشعة فوق البنفسجية المضرة ويمنع شيخوخة البشرة المبكرة.
• استخدمي واقي شمس بدرجة حماية SPF 30 على الأقل.

ايه الطريقة الصح لاستعمال واقي الشمس في روتين البشرة الدهنية

1. استعمليه بعد الكريم المرطب، واتأكدي ان بشرتك امتصت الكريم كويس قبل ما تحطي واقي الشمس.
2. وزعيه بشكل مستقيم وفي اتجاه واحد، مش بطريقة دائرية، عشان تتأكدي انه غطى كل مساحة بشرتك.
3. استعمليه قبل التعرض للشمس بـ 15 لـ 20 دقيقة، وكرري استعماله كل ساعتين.
4.  متبالغيش في الكمية عشان بشرتك تقدر تمتصه. كقاعدة عامة، استعملي ما يعادل نص معلقة صغيرة من واقي الشمس.

لو بتستعملي ميك أب، ازاي  تعيدي توزيع واقي الشمس فوق الميك اب؟

1. اتأكدي أن بشرتك جافة تماما من أي زيوت.
2. لو لاحظتي لمعان أو وجود زيوت على سطح البشرة، ممكن تنشفيها بالراحة بمنديل ورقي.
3. لو هتعيدي توزيع أي منتج من خطوات الميك اب بتاعك، اتأكدي أنه ثبت تماما قبل ما تعيدي توزيع واقي الشمس.
4. وزعي واقي الشمس، سواء بصوابعك أو بفرشاة أو بالبيوتي بليندر Beauty Blender أهم حاجة يكون التوزيع بالراحة جدا عشان ميبوظش الميك اب.
5. ممكن تستعملي واقي شمس في صورة سبراي، لأنه سبراي فمش هتحتاجي توزعيه ولا هيندمج مع  الميك اب، لكن هتحتاجي تكرري توزيعه مرات اكتر لأن معدل حمايته أقل.

روتين العين بالتفصيل في الروتين اليومي للبشرة الدهنية:

محيط العين هو أول منطقة بيظهر فيها علامات تقدم سن البشرة لأن الجلد فيها رقيق جدا ومفيهوش غدد دهنية ترطب بشرتك، وحوالين العين بيكون أغمق درجة أو درجتين عن باقي البشرة بسبب رقة الجلد وده بيزيد لما تكوني مرهقة و نومك مش ثابت، وكمان بتظهر خطوط رفيعة..في كمان عوامل تانية بتأثر على محيط العين بشكل سلبي هي:

1. الآشعة فوق البنفسجية
2. عوامل القلق والتوتر
3. عوامل وراثية

إيه أهم المشاكل اللي بتلاحظيها في  منطقة محيط العين؟

1. الهالات السودا
2. الخطوط الدقيقة
3. الانتفاخات

عشان كدة، أهم خطوة لمحيط العين هي الترطيب

استخدمي  كريم مرطب لمحيط العين الصبح وبالليل عشان تقللي من فرصة ظهور مشاكل النتفاخات والهالات والترهل.

ممكن تستخدمي مرطب للبشرة المعتاد لترطيب محيط العين، بشرط يكون قوامه خفيف ومبيسببش التهابات.

طريقة استخدام كريم العين في الروتين اليومي للبشرة الدهنية:

1. استعملي كمية في حجم حبة الفول.
2. متستخدميش كمية أكبر من اللي عينك محتاجاها، عشان الكريم ميدخلش جوة عينك ويسبب التهابها.
3. وزعي الكريم في محيط عينك في شكل نقط صغيرة، 
4. بصوابعك ابتدي وزعي الكريم في محيط عينك كله بطريقة التربيت (الطبطبة الخفيفة). 
5. ابدأي من زاوية العين واتحركي لبرة.
6. تجنبي دعك العين وانتي بتوزعي الكريم لأن ده بيسبب زيادة الخطوط الدقيقة تحت العين وممكن يسبب التهابات.
7. استني دقيقتين عشان تتأكدي من تشرب بشرتك للكريم بشكل كامل
8. كملي خطوات الروتين سواء بواقي الشمس أو لو بتستخدمي ميك اب.