الروتين الأسبوعي للعناية بالبشرة الدهنية

حمام البخار مهم في الروتين الأسبوعي للبشرة الدهنية:

• حمام البخار مفيد جدًا لبشرتك في روتين العناية بالبشرة الدهنية لأنه بيفتح المسام فبيسهل عملية التنظيف والترطيب وبيشيل الرؤوس السودا. 
• اعملي حمام البخار بعد تقشير البشرة وقبل ما تستعملي ماسك الترطيب.
• برغم ان حمام البخار مفيد جدًا لبشرتك، بس مستحب ميكونش أطول من عشر دقايق بس في الأسبوع، عشان ميحصلش التهاب أو حروق.

فوائد حمام البخار للبشرة

• بينشط الدورة الدموية وبيورد الوجه.
• بيفتح مسام بشرتك وبيساعدك تعملي تنظيف عميق للبشرة.
• بيزود من قدرة بشرتك على امتصاص المنتجات المختلفة.

ايه الطريقة الصح لعمل حمام بخار للبشرة

1. حطي 2-3 كوبايات من المياه في أي إناء على النار.
2. استني لحد ما تتأكدي أنه بيغلي تماما.
3. ضيفي زيوت عطرية زي اللافندر أو النعناع أو أي زيوت بتحبيها ومناسبة لبشرتك.
4. قربي وجهك من البخار، استخدمي فوطة كبيرة عشان تغطي البخار الخارج من المياه وتساعديه يدخل جوه بشرتك ويفتح مسامها.
5. خلي بالك أنك متقربيش أوي من المياه والبخار لأن لو بشرتك حساسة ممكن يسببلك التهاب أو حروق.

ماسك البشرة أساسي في الروتين الأسبوعي للبشرة الدهنية:

• بعد تقشير البشرة، يفضل تستخدمي ماسك مناسب لترطيب بشرتك ونضارتها.
• استخدام الماسك بيساعدك تتخلصي من الجلد الميت والأتربة اللي بشرتك بتتعرضلها طول الأسبوع، وكمان بيساعد في تجديد خلايا البشرة.
• أحسن نوع ماسك هو اللي بيحافظ على توازن الـ PH في البشرة، زي ماسك الطمي أو الفحم.
• ماسك الفحم بيساعدك تتخلصي من الجلد الميت ويخلي بشرتك نقية، والطمي بيشيل الزيوت الزيادة من البشرة وبينضف المسام.
• خلي بالك، ماسك الطمي أحيانًا بيسبب جفاف في البشرة. عشان كدة، مهم تختاري نوع يكون فيه مواد مرطبة، أو على الأقل تحافظي على لوشن الترطيب لو هتستخدمي ماسك طمي.

ايه الطريقة الصح لاستخدام الماسك الأسبوعي

1. بعد تقشير البشرة، استخدمي إيدك أو فرشاة مفرودة لتوزيع الماسك على البشرة.
2. وزعي الماسك على البشرة كلها (ما عدا محيط عينك) من تحت عند دقنك لفوق بحركة دائرية.
3. سيبي الماسك على بشرتك من 15 لـ 20 دقيقة.
4. عشان تشيليه، استخدمي مياه فاترة وفوطة نظيفة وابدأي شيليه بخفة.
5. متنسيش، بعد خطوة الماسك لازم تقفلي مسام البشرة عشان تمنعي انسدادها من جديد بالأتربة.

عشان تعملي ده، استخدمي التونر الخاص بيكي باستخدام قطنة خفيفة.