ماسك زيت الزيتون للوجه: هيفيد بشرتي ويرطبها ولا هيضرها؟
نوع البشرة:
, 
, 
, 
, 
الهدف من ماسك زيت الزيتون للوجه
بشرتك محتاجه ماسك زيت الزيتون؟
ماسك زيت الزيتون للوجه هدفه الاساسي تقشير البشرة، والتخلص من الجلد الميت، والأوساخ، وبيعتمد في كده على خشونة حبيبات السكر، فالتقشير بيتم بسبب فرك الحبيبات الخشنة دي على البشرة. وبالنسبة لترطيب البشرة بعد التقشير، فبيكون الاعتماد فيه على امتصاص البشرة لزيت الزيتون.
تحذيرات من ماسك زيت الزيتون للوجه
قبل استخدام ماسك زيت الزيتون:
- دايماً بنأكد إن الجلد يكون سليم مش بيعاني من أي مشاكل زي الالتهابات، أو حب الشباب، أو جروح مش ملتئمة بالكامل.
- الحقيقة إن طريقة التقشير اللي بتعتمد على فرك مادة خشنة على البشرة دي من أقسى الطرق في التعامل مع البشرة، ده لإن عملية الفرك هتسبب جروح دقيقة جداً في بشرتك، وتسيبها معرضة أكتر للأوساخ والعدوى بالجراثيم.
- مفيش لحد دلوقتي دليل علمي قاطع بفاعلية وأمان استخدام ماسك زيت الزيتون للوجه، فـ زي ما فيه ناس بتأكد تأثيره الفعال، فيه ناس برضه عانت من آثاره الجانبية، خاصة أصحاب البشرة الحساسة والمعرضة لحب الشباب.
- زيت الزيتون هو زيت تقيل، البشرة مش بتقدر تمتصه بسهولة وبشكل كامل، عشان كده وجوده على بشرتك ممكن يسد المسام، ويحبس الأوساخ والأتربة والدهون، فيسبب ظهور الرؤوس السودا، غير إنه بيكوّن بيئة خصبة للبكتيريا اللي بتسبب ظهور حب الشباب.
- زي ما زيت الزيتون مش مناسب لأصحاب البشرة الدهنية والمختلطة، بسبب عدم امتصاصه بسهولة، فبيتحد مع الدهون الزيادة الموجودة في البشرة، ويزود من مشاكلها، هو كمان مش مناسب لأصحاب البشرة شديدة الجفاف، ده لإن حمض الأوليك Oleic acid الموجود في زيت الزيتون مسؤول عن تكسير قدرات الترطيب الطبيعية الموجودة في البشرة الجافة، لإنه بيكسر الحاجز الواقي للبشرة فبيسبب فقد الرطوبة من الجلد.
- كتير بيستخدموا زيت الزيتون كمزيل طبيعي للمكياج، لإنه بيقدر يكسر مكونات المكياج المضاد للمياه، لكن خدي بالك مايدخلش عينك وانتي بتستخدميه، لإنه هيسببلها التهاب شديد وتهيج، كمان بعد ما تخلصي لازم تتخلصي من بقايا الزيت على بشرتك باستخدام الغسول بتاعك، وبعدين تستعملي الكريم المرطب.
- في أمهات بتحب تستخدم زيت الزيتون على أجسام أطفالهم للعناية ببشرتهم، لكن ده ممكن يسبب للأطفال بعد كده إصابات بحالات من الإكزيما.
اعرفي رأي المتخصصين في استخدام ماسك زيت الزيتون للبشرة
- د. ساندي سكوتنيكي أخصائية الأمراض الجلدية المعتمدة من مجلس البورد الأمريكي بتقول: “في حين إن زيت الزيتون بيتمتع عموماً بأمان عالي، ودرجات منخفضة من الحساسية، إلا إنه ممكن يتسبب في أضرار لأصحاب البشرة الحساسة أو الجافة أو المعرضة للإكزيما، بسبب احتوائه على حمض الأوليك Oleic acid”.
- إي تينج نج كيميائية مستحضرات التجميل، ومؤسِّسة براند العناية بالبشرة الأسترالي “هوب آند كوتون Hope & Cotton” بتقول: “أصحاب البشرة الدهنية والمعرضة لحب الشباب مش من المفروض يستخدموا زيت الزيتون، لإن الأحماض الدهنية اللي فيه هي مصدر الغذاء الأساسي لنمو البكتريا المسببة لحب الشباب، خاصة إن البشرة الدهنية مش محتاجة أي زيوت خارجية للترطيب”، وبتوافقها على كده د. ساندي سكوتنيكي.
- د. مونا جوهارا طبيبة الأمراض الجلدية، وأستاذ مساعد في جامعة “يال” بتقول: “صحيح زيت الزيتون بيحتوي على بعض الخصائص المفيدة، لكن الأفضل استخدام منتجات من شركات موثوقة، يكون زيت الزيتون داخل في تركيبها، المنتجات دي فاعليتها هتكون أحسن لبشرتك، وفي نفس الوقت هتجنبك مشاكل ظهور حب الشباب، أو تكسير الحاجز الواقي لبشرتك، أو اللمعان والملمس الدهني”.
الماسك بيتحضر بمنتهى البساطة بخلط زيت الزيتون مع السكر البني.
ازاي تستخدمي ماسك زيت الزيتون على بشرتك
- افركي بشرتك بأطراف صوابعك بالماسك، خاصة أطراف الأنف والدقن والجبهة.
- اشطفي بشرتك بالمياه الدافية وبعدين المياه الباردة، ونشفيها بالراحة.
- وبعدين ادهني بشرتك بزيت الزيتون، وسيبيه عليها لحد ما تمتصه تماماً لترطيبها بعد التقشير.
الفوايد
فوائد زيت الزيتون للوجه
زيت الزيتون بيستخدم في روتين العناية بالبشرة من عصور فاتت في:
- ترطيب الجلد.
- محاربة ظهور علامات التمدد Stretch marks.
- علامات تقدم السن، بسبب خواصه المضادة للأكسدة.
- من فوائد زيت الزيتون للوجه انه بيساعد في علاج آثار الندبات والجروح، لأنه غني بفيتامينات K,E,D,A المفيدة للبشرة.
وهيرطب البشرة اكتر لما تكوني محدده روتين للعناية ببشرتك ثابت وتستخدمي سكراب السكر وزيت الزيتون كل أسبوع.
الأسئلة الشائعة
هل الاستخدام الموضعي لزيت الزيتون مفيد فعلاً للبشرة؟
الحقيقة الإجابة مش بالبساطة دي، صحيح هو بيحبس الرطوبة جوة بشرتك، لكنه كمان كوميدوجينيك Comedogenic بمعنى إنه بيسد المسام، وده بيحبس برضه بكتيريا جوة البشرة.
فهو مش من الزيوت المنصوح بيها للبشرة خاصة البشرة الدهنية والمعرضة لحب الشباب والبشرة الجافة، لكن ده مايمنعش إنك هتلاحظي تأثيره لو استخدمتيه لمناطق زي الكوعين والركبتين، أو حتى كمرطب عميق للشعر.
إيه أفضل أنواع زيت الزيتون للبشرة؟
دايماً اختاري زيت الزيتون البِكر الممتاز المعصور على البارد وغير المكرر، عشان تضمني احتفاظه بكل الفيتامينات والمكونات الفعالة ومضادات الأكسدة، وتضمني كمان خلوّه من المواد الحافظة الضارة اللي ممكن تؤذي بشرتك.
إيه الطريقة اللي ممكن أستخدم بيها زيت الزيتون؟
أفضل طريقة هي خلط نقطة أو نقطتين من زيت الزيتون مع كريمك المرطب، الكمية دي هتكون كفاية جداً إنك تحصلي على فوايد زيت الزيتون وتتجنبي أضراره.
عدد المكونات : 1
وقت التحضير: 5
- معلقة كبيرة من زيت الزيتون.
- ½ معلقة من السكر البني.
االمصادر
اسم المصدر: skinspanewyork
كلنا عارفين إن زيت الزيتون مفيد جداً للصحة والبشرة والشعر، لكن مش كتير يعرفوا إنه زي ما له فوايد ممكن كمان يكون له أضرار.
المقال ده بيستعرض فوايد وأضرار واستعمالات زيت الزيتون للبشرة بالتفصيل وبشكل مبسط.
اسم المصدر: Stylecraze
لكل عملة وجهين، وزيت الزيتون مش استثناء، صحيح فيه ناس بتوصفه إنه أفضل الزيوت في عالم الصحة والجمال، لكنه برضه له عيوب وآثار جانبية ممكن ماتجيش على بالك.
المقال ده بيضم 14 مشكلة ممكن يسببها زيت الزيتون لبشرتك بشكل خاص ولصحتك بشكل عام بشكل سريع وموجز.
اسم المصدر: Medicalnewstoday
صحيح زيت الزيتون غني بالفيتاميات ومضادات الأكسدة، وممكن يكون له تأثيرات مضادة للبكتيريا، ومع ذلك فالأبحاث اللي بتثبت فاعليته بالاستخدام الموضعي للبشرة محدودة جداً.
المقال ده بيعرض اللي الأبحاث توصلت ليه من فوايد وأضرار لاستخدامات ماسك زيت الزيتون للبشرة.
اسم المصدر: Marieclaire
في المقال ده هتلاقي آراء المتخصصين ودكاترة التجميل في استخدام زيت الزيتون بشكل مباشر على البشرة، وإذا كانت الفوايد اللي ممكن يديها لبشرتك تستاهل المجازفة بالمشاكل اللي ممكن يسببها.
اسم المصدر: Byrdie
المقال ده بيستعرض كل ما يخص زيت الزيتون من مكونات، وفوايد، وأضرار، واستعمالات، بوجهة نظر طبية سهلة ومبسطة، ورأي دكاترة الجلدية في الاستعمال المباشر لماسكات زيت الزيتون على البشرة.
خليكي أول واحدة تضيف ريڤيو