ماسك حبوب الفحم للبشرة، مميزات من غير العيوب – إزاي؟

تحذيرات مهمة تعرفيها قبل ما تستخدمي ماسك حبوب الفحم للبشرة

نصيحتنا ليكي دايماً استخدمي كريم مرطب بعد ماسك حبوب الفحم النشط لتجنب جفاف البشرة، وماتستخدميش الماسك ده أكتر من مرة في الأسبوع أو مرة كل أسبوعين.

دايماً بنأكد إن الجلد يكون سليم مش بيعاني من أي مشاكل زي الالتهابات، أو حب الشباب، أو جروح مش ملتئمة بالكامل.

خلينا بعد كده نتكلم عن مدى فاعلية ماسك حبوب الفحم بالتحديد

ماسكات حبوب الفحم النشط ممكن يكون ليها آثار جانبية زي:

• الاحمرار والتهيّج: تقشير الماسك بسرعة من على البشرة ممكن يؤذي بشرتك، ويسببلها تهيج والتهابات، غير إحساسك بالألم أثناء وبعد تقشير الماسك.
• الجفاف: لو كان للفحم النشط القدرة على امتصاص الزيوت الزيادة، فممكن جداً إنه يمتص كل الزيوت الطبيعية والمفيدة من بشرتك، وده ممكن يؤدي لجفاف الجلد وتقشره في بعض الأحيان.
• زيادة حبوب الشباب: زيادة امتصاص كل الزيوت الطبيعية من البشرة هيخلي البشرة تعوض الزيوت المفقودة دي عن طريق زيادة إفراز المزيد من الدهون، وده ممكن يزود من حبوب الشباب.

طريقة تقشير الماسك من على الجلد في الحقيقة هي طريقة قاسية جداً على بشرتك، وممكن تكون أضرارها أكتر من فوايدها.

ده لإن غير إنها مؤلمة جداً، كمان ممكن تزيل طبقة الجلد السطحية اللي بتحمي بشرتك من الأشعة فوق البنفسجية، والأوساخ، والبكتيريا، وباقي العوامل الخارجية والملوثات، وده ممكن يسببلك أضرار ومشاكل في الطبقات العميقة من البشرة تكون أصعب في حلها بعد كده.

استخدام المياه العادية في مكونات الماسك مش أفضل اختيار للبشرة، لأنها مش منقّاة من الشوايب، غير إنها بتحتوي على الكلور، فمش أحسن حاجة إنك تسيبيها على بشرتك فترات طويلة.

معروف طبياً إن حبوب الفحم النشط فعالة في تنقية الجسم من السموم والمواد الضارة، والفاعلية دي هي السبب في إن بعض خبراء التجميل اعتقدوا إنها ممكن تشتغل بنفس الطريقة عند الاستخدام الموضعي على الجلد، فتمتص الشوايب، والأوساخ، والزيوت الزيادة، وحتى البكتيريا موجودة في مسامات البشرة.

ده على الرغم من إن الأبحاث في فوايده الموضعية على الجلد لسة محدودة جداً، ومفيش دليل حقيقي يثبت قدرة الفحم النشط على امتصاص الشوايب والزيوت من البشرة بنفس آلية امتصاص السموم من الجسم، وكلها خبرات شخصية وقصص متداولة.

لو حابة برضه تجربي ماسك حبوب الفحم، وتحكمي بنفسك إذا كان فعال ولا لأ، دي نصايحنا ليكي:

• استخدمي حبوب الفحم النشط اللي هتلاقيها في الصيدليات، هتكون على شكل أقراص واطحنيها بنفسك في البيت، بلاش مستحضرات الفحم الخشنة منخفضة الجودة لأنها هتضر بشرتك.
• بلاش تجربي الماسك ده لو بشرتك حساسة أو جافة، ممكن تجربيه لو بشرتك عادية أو دهنية أو مختلطة، وكفاية أوي مرة كل أسبوع أو أسبوعين.
• استخدمي وصفات الماسكات اللي بتتغسل بالمياه الدافية أو فوطة مبلولة بمياه دافية، هتكون ألطف على بشرتك من الماسكات اللي بتتقشر، لأنها بدل ما تزيل طبقة الجلد السطحية، بتعتمد على خشونة حبيبات الفحم في التقشير اللطيف للجلد الميت، وماسك الفحم هيزيل الشوايب من البشرة وهو بيتغسل، ده غير إنها مش مؤلمة خالص.

ودول وصفتين لماسكين ممكن تجربيهم

ماسك حبوب الفحم مع جل الصبار:

• الماسك ده مناسب بشكل خاص لبشرة المراهقين الدهنية اللي بيحصلها حب شباب، اللي بتفرز زيوت زيادة وبتكون معرضة لحب الشباب والرؤوس السودا والبيضا، لإن جل الصبار له خواص مضادة للأكسدة ومضادة للجراثيم، غير تأثيره المهدئ للبشرة.
• اخلطي معلقة من حبوب الفحم المطحونة مع معلقة من جل الصبار لحد ما يمتزجوا كويس، وبعدين ضيفي عليهم نقطتين من زيت الجوجوبا.
• وزعي الماسك على بشرتك بأطراف صوابعك وابعدي عن المناطق المحيطة بالعين والفم، واغسليه بمياه دافية بعد 10-15 دقيقة، واستخدمي بعده كريم مرطب مناسب للبشرة الدهنية.

ماسك حبوب الفحم مع ماء الورد:

• الماسك ده مناسب للبشرة العادية والجافة، اللي حابة تستفاد من مميزات الفحم النشط، وفي نفس الوقت تتجنبي الجفاف بسبب الامتصاص الزائد لزيوت البشرة الطبيعية، لإن ماء الورد وزيت اللوز الحلو بيوازنوا عملية امتصاص الزيوت.
• اخلطي معلقة من حبوب الفحم المطحونة مع معلقة من ماء الورد لحد ما يمتزجوا كويس، وبعدين ضيفي عليهم نقطتين من زيت اللوز الحلو.
• وزعي الماسك على بشرتك بأطراف صوابعك وابعدي عن المناطق المحيطة بالعين والفم، واغسليه بمياه دافية بعد 15 دقيقة، واستخدمي بعده كريمك المرطب.