ماسك القهوة والنشا لترطيب وتفتيح البشرة والتخلص من الجلد الميت
نوع البشرة:
, 
, 
, 
, 
الهدف من ماسك القهوة والنشا
ماسك القهوة والنشا من الماسكات المشهورة ومعروفة، وكتير جداً بيتكلموا عن فوايدها من تفتيح وترطيب البشرة، وكمان بتساعد على التخلص من الجلد الميت وتنقية البشرة من الشوايب.
تحذيرات من ماسك القهوة والنشا
قبل استخدام ماسك القهوة للوجه، خلي بالك من:
القهوة من المواد الطبيعية اللي بتستخدم بشكل واسع سواء في منتجات العناية بالبشرة زي الغسول والمرطب ومنتجات العناية بالعيون وكمان في سكراب القهوة للوجه أو في الوصفات الطبيعية، وزي ما بيتقال إن ليها فوايد كتيره للبشرة، فهي كمان ممكن تسبب أضرار، منها:
- جزيئات القهوة ممكن إنها تسبب خدوش وجروح للبشرة.
- ممكن إنها تسبب جفاف البشرة، لأنها بتسحب الدهون الزيادة من البشرة.
- ممكن إنها تزيد من الحبوب، ودا لو استخدمتي القهوة على بشرة مصابة بحب الشباب ممكن تنقلي البكتيريا المسببة للحبوب دي للبشرة بالكامل.
- القهوة بتحتوي على مجموعة من مضادات الأكسدة والفيتامينات والأحماض، ولكن غير مثبت علميًا بأن استخدام القهوة بيفيد البشرة أو بيعالج مشاكلها المختلفة.
- النشا ممكن إنها تسبب في حساسية لبعض الأشخاص ويكون سبب في احمرار والتهاب للبشرة، خصوصاً لأصحاب البشرة الحساسة وممكن كمان إنه يتسبب في جفاف البشرة، وعشان كدا لو قررتي إنك تستخدمي الماسك دا هيكون من الأفضل اختباره على جزء صغير من البشرة.
هل المتخصصين موافقين على ماسك القهوة لتفتيح البشرة ولا ضده؟
- بشكل عام مفيش أي دراسات علمية بتثبت أو تنفي فوايد وأضرار الماسك دا، ولكن العلماء اتكلموا بشكل عام عن التقشير الفيزيائي للبشرة أو المعروف باسم حبيبات تقشير البشرة سواء عن طريق منتجات التقشير الخاصة بالشركات المختلفة أو التقشير المنزلي باستخدام الوصفات المختلفة زي القهوة، وقالوا إن استخدام السكراب بشكل متكرر ممكن إنه يتسبب في ضعف الحاجز الواقي للبشرة.
- في دراسة اتعملت سنة 2013 بتقول إن المواد الموجودة في القهوة بتساعد في تعزيز صحة الجلد، فالكافيين وهو أحد أهم مكونات القهوة الأساسية، بيعمل كمضاد للأكسدة، ويعزز مستويات الكولاجين في البشرة، ويقلل من شيخوخة الخلايا.
- كمان مفيش أي إثباتات أو دراسات عن استخدام النشا للبشرة أو أي دراسات علمية بتأكد فوايد الماسك.
اعملي ماسك القهوة بالطريقة دي
- اخلطي القهوة مع مياه أو مياه الورد.
- دوّبي القهوة في مياه لحد ما تدوب بالكامل.
- اخلطي النشا مع القهوة اللي تم تذويبها في المياه وقلبيهم كويس جداً.
استخدمي ماسك القهوة للبشرة بخطوات محدده عشان بشرتك تستفيد منه
- نضفي بشرتك باستخدام الغسول المناسب.
- وزعي الماسك على بشرتك.
- سبيه لمدة 15 دقيقة.
- دلكي بشرتك بحركات دائرية.
- اشطفي بشرتك بالمياه واستخدمي التونر والمرطب.
الفوايد
فوايد القهوة للبشرة
القهوة والنشا من المواد الطبيعية اللي بتستخدم بشكل كبير في الوصفات الخاصة بالبشرة، ودا لأنه منتشر بين الناس بإن ليهم فوايد كبيرة للبشرة.
فوائد القهوة للبشرة
- بتهدي التهاب البشرة، ودا بسبب إنها بتحتوي على خصائص بتساعد في تخفيف التهاب واحمرار البشرة.
- بتساعد على الحماية من أشعة الشمس، ودا لأن القهوة بتحتوي على مضادات للأكسدة زي البوليفينول.
- بتساعد على علاج حب الشباب، ودا بفضل انها بتحتوي على مضادات أكسدة وبعض المنشطات وأحماض الكلوروجينيك.
- بتساعد على تفتيح تصبغات البشرة اللي بتكون بسبب الالتهابات وده بفضل انها بتحتوي على حمض الكلورجينيك.
فوايد النشا للبشرة
النشا من المكونات الطبيعية اللي هتفيد بشرتك لما تضيفيها في ماسك تقشير الوجه بالقهوة
- بيساعد على تحفيز إنتاج الكولاجين، لأنه بيحتوي على نسبة عالية من البروتين، ودا بيحافظ على نضارة البشرة.
- بيساعد على تفتيح البشرة والتقليل من علامات الحبوب والتصبغات، ودا بفضل إنها بتحتوي على فيتامين أ.
- بيقلل من ظهور الحبوب، ودا عن طريق إنها بيمتص الدهون الزيادة من البشرة، وكمان لأنه بيحتوي على الزنك.
- بيرطب ويغذي البشرة، ودا بفضل إنها بتحتوي على مجموعة من الفيتامينات زي فيتامين ب ١ وفيتامين ب ٢.
- بيحفز من عملية تجديد خلايا البشرة، ودا بفضل إنه بيحتوي على مجموعة من المعادن زي الكالسيوم والحديد واللي كمان بتحافظ على البشرة نضرة.
الأسئلة الشائعة
ينفع استخدام الماسك دا أكتر من مرة في الأسبوع؟
القهوة بتحتوي على جزيئات ممكن إنها تسبب خدوش أو جروح للبشرة، كمان النشا ممكن استخدامه بشكل متكرر يسبب تحسس للبشرة، كمان ممكن يحصل جفاف للبشرة، فالأفضل ماتستخدميش الماسك دا أكتر من مرة في الأسبوع.
الماسك دا ينفع للبشرة الدهنية؟
أيوة الماسك مناسب للبشرة الدهنية، ودا لأن القهوة بتعمل على تنظيف البشرة وبتمتص الدهون الزيادة، وكمان النشا بتمتص الزيوت والدهون من البشرة.
ممكن أستخدم الليمون في الماسك دا؟
هو العلماء والدراسات بتقول إن استخدام الليمون بشكل مباشر على البشرة ممكن يتسبب في تحسس والتهاب للبشرة، فيُفضّل عدم استخدامه، ولكن لو هنستخدمه بنضيف معلقة صغيرة من الليمون ونختبر الماسك على جزء صغير من البشرة قبل استخدامه.
عدد المكونات : 2
وقت التحضير: 5
- معلقتين قهوة.
- معلقة نشا.
- مياه ورد أو مياه عادية .
االمصادر
اسم المصدر: Medicalnewstoday
بتعتبر القهوة مصدر للعناصر الغذائية ومضادات الأكسدة المفيدة للبشرة وفروة الرأس والشعر، يمكن استخدامها للتقشير وعلاج حب الشباب وموازنة مستويات حموضة البشرة، في المقال دا هتلاقي معلومات عن القهوة وفوايدها وطرق استخدامها للبشرة وكمان للشعر، وكمان المقال بيحتوي على أبحاث بتوضح فوايد القهوة بشكل عام.
اسم المصدر: healthline
على الرغم من استخدام القهوة على نطاق واسع كمشروب إلا إنها انتشرت بشكل كبير كعلاج بديل للبشرة، ودا بفضل إنها بتحتوي على مجموعة من مضادات الأكسدة واللي بتشمل الفينولات ووظيفتها محاربة الجذور الحرة اللي ممكن تسبب في تلف الجلد، المقال دا بيشرح أهمية القهوة للبشرة، وهل ممكن إنها تفيد البشرة بشكل مباشر أو لا.
اسم المصدر: Kaffebueno
المقال دا بيشرح فوايد القهوة للبشرة والشعر ومكتوب بوساطة KAFFE BUENO ودي شركة دنماركية للعلوم الحيوية بتستخدم الكيمياء الخضراء والتكنولوجيا الحيوية لإعادة تدوير المنتجات الثانوية للقهوة إلى مكونات نشطة وعملية للعناية الشخصية.
اسم المصدر: Sehajmal
إيه هو النشا؟ وفوايده للبشرة؟ وأشهر الوصفات وطرق تحضيرها وطريقة استخدامها؟ كل المعلومات دي هتلاقيها بالتفصيل في المقال دا عن النشا واستخداماته وفوايده للبشرة ووصفات مختلفة باستخدام النشا للبشرة.
خليكي أول واحدة تضيف ريڤيو