ايه فائدة ماسك القهوة بالزبادي؟

الماسك ده بيدي الشعر ترطيب عميق وبينعمه ويخفف من تجعد خصلاته. كمان بينضف فروة الرأس ويقشرها فبيدي شعر صحي ولون حيوي. مناسب جدا في علاج قشرة الشعر وتقليل ظهورها. مفيد جدا للشعر الدهني لأنه بيتحكم في إفراز الزيوت وبيساعد على حل المشكلة دي، وبرضه مفيد للشعر الجاف بسبب ترطيبه العميق وتنشيطه للبصيلات.

ايه هي فوايد القهوة للشعر؟

القهوة بتنشط جذور الشعر وتحسن ملمسه لأنها غنية بالكافيين. الكافيين كمان بيساعد في منع تساقط الشعر وتسريع نموه، لأنه بيقلل تأثير هرمون ثنائي هيدرو التستوستيرون DHT، الهرمون ده بيضر بصيلات الشعر ومسئول عن الصلع في الرجال. كمان بتساعد في فك التشابك، وتخلي الخصلات أقوى وأكتر نعومة. عند استخدامها كسكراب Scrub، بتعمل ديتوكس Detox لفروة الرأس وبتخلصها من بواقي المنتجات المتراكمة فيها، فبتساعد على الحفاظ على صحة فروة الرأس. لو استخدمتي القهوة المخمرة كسبراي لشعرك هتلاقيها بتدي حيوية ولمعان للون شعرك الطبيعي. غنية بالفيتوستيرولات phytosterols فبتنشط الدورة الدموية لو دلكتيها في فروة الرأس. ممكن استخدام عجينة من القهوة كصبغة طبيعية تغطي الشعر الرمادي، بالذات لو ضيفتي ليها القرفة البودر هتقوي اللون وتنشط فروة الرأس وتساعد على نمو الشعر. لو خلطتي القهوة المخمرة مع البلسم بتاعك، هتقوي تأثيره وتغذي خصلات الشعر من أعماقها. ممكن كمان تضيفي القهوة الطبيعي للشامبو بتاعك، ده هينشط فروة الرأس و يخلي الشعر يطول أسرع.

ايه هي فوايد الزبادي للشعر؟

بيقضي على القشرة لأنه بيقضي على الفطريات فبيساعد على تنضيف فروة الرأس بعمق من أي زيوت أو مواد متراكمة فيها، ويخليها صحية أكتر. بيهدي فروة الرأس من الحكة والالتهابات اللي ممكن تسببها القشرة، واللي بتوصل في بعض الأحيان إنها بتكون حمرا ومتهيجة، فبيلطف ويديكي إحساس فوري بالراحة. بيوازن مستوى الحموضة في فروة الرأس، فبيحمي الشعر من البهتان والقشرة. بيمنع تساقط الشعر لأنه بيقوي الجذور وبيساعد البصيلات على الحصول على التغذية اللازمة. بيرطب كل خصلة في الشعر ويسيبها خالية من التجعد والتشابك. بيدي الشعر لمعان مع الاستخدام المنتظم، لأنه غني بالعناصر الغذائية المهمة لشعر صحي. بلسم طبيعي للشعر بينعمه ويديله لوك صحي وانسيابي. غني بالبروتين والعناصر اللي بتزود تدفق الدم لفروة الرأس، وحمض البانتوثينك pantothenic acid اللي بيمنع ضعف الشعر وتساقطه. بيغذي الشعر وبيزيل خلايا الجلد الميتة من فروة الرأس لأنه بيحتوي على لاكتيك أسيد lactic acid فبيساعد في نمو الشعر بشكل صحي.

ايه هي فوايد الليمون للشعر؟

بيحسن صحة الشعر ويسرع نموه. بينضف فروة الرأس من الأوساخ والأتربة المتراكمة، وبيفتح بصيلات الشعر. غني بفيتامينات E و C اللي بيسرعوا معدل نمو الشعر عن طريق زيادة إنتاج الكولاجين. غني كمان بعناصر غذائية كتير زي والكالسيوم والماغنسيوم والبكتين والفلافونويد flavonoids وكلهم مهمين جدا لنمو الشعر. بيحتوي كمان على حمض السيتريك citric acid اللي بيمنع تفكك بصيلات الشعر وبالتالي بيمنع التساقط. يساعد في التحكم في إفراز الزيت في فروة الرأس، فبيقلل المشاكل اللي زي قشرة الشعر والحبوب في فروة الرأس، وكمان بيمنع اللوك الدهني للفروة أو الشعر. مضادات الأكسدة والعناصر الغذائية اللي فيه بتصلح بهتان لون الشعر وتديله لوك ناعم ولامع. ليه خواص مضادة للفطريات فبيمنع الالتهابات مع الاستخدام المنتظم. لو حابة تدي لشعرك لون أفتح من غير ما تستخدمي كريمات الأكسجين اللي بتدمر الشعر تماما، عصير الليمون هيساعدك جدا في ده بالذات لو درجة لون شعرك مش غامقة زي الأسود والبني الغامق.