فوايد ماسك دقيق الأرز للبشرة بين آراء المتخصصين والانفلونسر

قبل ما تستخدمي ماسك دقيق الارز على بشرتك محتاجه تخلي بالك من النقط دي

• دايماً بننصحك قبل ما تجرّبي أي ماسك للبشرة لأول مرة إنك تعملي اختبار حساسية للماسك دا على جزء من دراعك، وتستني 48 ساعة قبل ما تستخدمي الماسك على بشرتك، لو ظهرت أي علامات احمرار أو تهيج على دراعك يبقى بشرتك حساسة للماسك دا وتبعدي عنه تماماً.
• كمان دايماً بنأكد إن الجلد يكون سليم مش بيعاني من أي مشاكل زي الالتهابات، أو حب الشباب، أو جروح مش ملتئمة بالكامل، خلينا بعد كدا نتكلم عن مدى فاعلية الماسك دا بالتحديد
• بالرغم من استخدام مكونات كتير مستخرجة من الأرز في منتجات العناية بالبشرة، إلا إنه مش واضح إذا كان ماسك دقيق الأرز لوحده مفيد للبشرة ولا لأ بسبب قلة الدراسات.
• استخدام المياه العادية في عجن الماسك ممكن يسبب مشاكل للبشرة، لأنها مش منقّاة من الشوائب وبتحتوي على الكلور، فماينفعش تسيبيها على بشرتك فترات طويلة.
• صحيح حمض الفيتيك Phytic Acid له تأثيرات مفيدة للبشرة، لكن عمرنا ما نقدر نعرف هل الكمية اللي امتصتها البشرة من ماسك الارز كفاية عشان تدي التأثيرات دي ولا لأ.
• الاعتماد على دقيق الأرز الأبيض المنتشر بصورة أكبر في بيوتنا هو غلط بالأساس، لأن معظم محتواه بيكون من النشويات، وتركيز المواد الفعالة اللي البشرة محتاجاها بيكون ضعيف جداً.
• بعض الإنفلووينسرز بيقولوا إن ماسك دقيق الأرز ممكن يساعد في الحماية من الشمس، لأنه بيحتوي على مركبين هما: حمض الفيريوليك Ferulic Acid وبارا أمينو حمض البنزويك PABA، غير إن اليوتيوب مليان بوصفات تفتيح للبشرة باستخدام ماسكات المكون الأساسي فيها هو دقيق الأرز بناءً على إنه مقشر وواقي من الشمس.

لكن دا مش صحيح لسببين:

1. زي ما قلنا إنه مش معروف إذا كانت المركبات دي مركزة بدرجة كفاية في دقيق الأرز عشان تدي نفس الفوايد زي المستخلص ولا لأ.
2. صحيح من خواص مادة بارا أمينو حمض البنزويك PABA الموجودة في دقيق الأرز إنها بتحمي من الأشعة فوق البنفسجية وكانت بتستخدم زمان كصن سكرين، غير إنها بتعزز إعادة نمو الخلايا، إلا إنها مادة بتسبب حساسية، فمنظمة الدواء والغذاء FDA مابقتش تعرّفها على إنها مكوّن آمن في تركيبات الصن سكرين.