الطلبات
فيتامين الحديد وتأثيره على تساقط الشعر
الحديد عنصر مهم جدا في الجسم لأنه بيدخل في تكوين كرات الدم الحمراء و دي المسؤله انها تشيل الاكسجين في الجسم ، الحديد بيكون موجود في انواع كتير من الأكل اللي بنستهلكه بشكل يومي .
إيه هي الأكلات اللي بتحتوي على الحديد؟
التوت
البيض الكامل
السالمون والتونة
الدواجن
اللحوم الحمراء
الكبدة
دقيق فول الصويا
حبوب الفطار
الفواكه المجففة زي المشمش المجفف
المكسرات
الفاصوليا الحمراء والفول والحمص
الخضروات الورقية الداكنة
إيه هي كمية الحديد اللي بنحتاجها بشكل يومي؟
لازم ناخد بالنا اننا ناخد الكم الكافي من الحديد بشكل يومي عشان نتجنب مخاطر أعراض نقص الحديد ، الكم اللي بنحتاجه بشكل يومي من الحديد هو :
- 8.7 مليجرام في اليوم للرجال اللي سنهم فوق 18 سنة.
- 14.8 مليجرام في اليوم للسيدات اللي سنهم من 19 إلى 50 سنة.
- 8.7 مليجرام في اليوم للسيدات اللي سنهم فوق الخمسين.
ناخد بالنا أننا لو عدينا الحد المسموح من الاحتياج اليومي للحديد فوق 20 مليجرام هتحصل أعراض جانبية خطيرة جدا.
اي اللي ممكن يحصل لو الحديد في الجسم نقص؟
هيحصل أنيميا نقص الحديد، ودي بتكون أعراضها :
- تعب ونقص في الطاقة.
- ضعف في الضوافر.
- خفقان القلب وزيادة ضربات القلب.
- صداع.
- شحوب في لون البشرة.
- تساقط الشعر ( هنا هنلاحظ أن الشعر بيتساقط جدا لما بنيجي نسرحه بالفرشه أو لما نيجي نغسله ).
إيه الأعراض اللي ممكن تحصل لو زادت نسبة الحديد؟
الأعراض اللي ممكن تحصل لو خدنا كميات كبيرة من الحديد فوق الحد المسموح
- مغص شديد في المعدة.
- غثيان.
- امساك وده عرض جانبي شائع جدا.
*وممكن يكون مميت في حالات الاطفال. عشان كده لازم ناخد بالنا ونبعده أدوية الحديد عن الاطفال.
*منظمة الصحة العالمية بتنصحنا أننا لازم نمشي على نظام غذائي متوازن فيه كل العناصر الغذائية ذي الحديد عشان نحافظ على صحتنا.
ليه الحديد بيسبب تساقط الشعر ؟
- تساقط الشعر بيحصل لكل الأعمار سواء أطفال أو كبار وبيحصل كمان للسيدات والرجال بغض النظر عن العمر أو نوع الجنس ومش شرط يكون بسبب الصلع الوراثي ؛ لكن كمان نقص العناصر الغذائية في الجسم زي الحديد بيكون سبب مباشر في تساقط الشعر.
- لو حصل خلل في النظام الغذائي بتنقص العناصر اللي الجسم بيحتاجها زي الحديد وبالتالي بينقص الهيموجلوبين في الجسم اللي بينقل الاكسجين للخلايا ومن ضمنها الخلايا المسؤولة عن نمو وإصلاح الشعر والضوافر وبالتالي بيحصل تساقط الشعر.
- هنلاحظ بعد الإصابة بأنيميا نقص الحديد إن الشعر بيقل وبينحف ويتساقط بشكل شبيه للتساقط الشعر الناتج عن خلل هرموني ، هنلاقي إن الشعر بيتساقط من نص الراس ومن التاج وخط الراس.
- هنلاحظ نفس أعراض تساقط الشعر الهرموني هنلاقي في شعر متساقط بشكل زايد وأحنا بنسرح بالفرشة أو واحنا بنستحمى أو عالمخدة.
- هنلاحظ ان في فراغات بدأت تظهر في فروة الراس وخصوصا لو وقفنا في إضاءة قوية.
- تساقط الشعر بيزيد في حالات الحمل والرضاعة بسبب نقص فيتامين الحديد فلازم تتابعي مع الطبيب المتخصص عشان تمشي على نظام غذائي مناسب و مكملات غذائية في حالات نقص الحديد.
- لو لاحظتي ان في تساقط ماتقلقيش وحاولي ماتتوتريش بس توجهي فورا للطبيب المتخصص.
- الطبيب هيعملك الفحوصات اللازمة وهيتابع معاكي خطوة بخطوة لحد مايعالج تساقط الشعر.
ازاي نقدر نعالج نقص الحديد وتساقط الشعر؟
- أفضل طريقة نقدر نعالج بيها تساقط الشعر الناتج عن نقص الحديد هي أننا نعالج المشكلة الرئيسية وهي نقص الحديد.
- لازم نروح للدكتور المتخصص عشان نقيس نسبة الحديد في الجسم.
- الطبيب في الغالب هيطلب منك تحليل دم للفيريتين ferritin ، وده بيقيس الفيريتين ferritin وهو البروتين المسؤول عن تخزين الحديد في الجسم.
- لو تحاليلك بينت أن في نقص لمستوى الحديد في الجسم هيوصفلك الطبيب نوع مكملات الحديد المناسب ليكي.
- لما نبدأ العلاج بمكملات الحديد في بعض الحالات ممكن نلاحظ تغير في حركة الأمعاء وأن ممكن يحصل اضطراب في المعدة أو إمساك ولون البراز ممكن يتغير للون الأسود ، في الحالة دي بنتواصل مع الدكتور بخصوص أي أعراض جانبية.
- تساقط الشعر بسبب نقص الحديد بيكون بشكل مؤقت ، بمجرد ما نبدأ ناخد مكملات الحديد بيقف تساقط الشعر بشكل تدريجي.
طرق علاج فقر الدم نتيجة نقص الحديد في الجسم
- لازم بعد بتساقط الشعر الغير طبيعي اننا نتواصل مع الطبيب المعالج بشكل سريع ده في حالة اننا لقينا شعر بيتساقط عن المعدل الطبيعي على المخدة أو في الفرشة أو أثناء الشاور بشكل زايد.
- الطبيب عادة بيوصف مكملات حديد بشكل أساسي في العلاج لأن دي أهم خطوة في علاج تساقط الشعر الناتج عن أنيميا نقص الحديد.
- بيوصي الطبيب بتناول مكملات الحديد بشكل يومي و بيستمر ده لفترة من 3 – 6 شهور بعد الفترة دي بيبدأ مخزون الحديد بيرجع للمعدل الطبيعي في الجسم.
- بس ممنوع اننا ناخد مكملات الحديد بدون استشارة الطبيب لان ده ممكن يؤدي لأعراض جانبية خطيرة.
- في حالات أنيميا نقص الحديد الحرجة بيوصف الطبيب عادة أننا نستخدم حقن حديد بدل من مكملات الحديد الكبسولات.
- ودي عادة بتكون حقن عضلي أو بتتعلق في محلول وريدي.
- لازم زي ما تكلمنا انها تكون تحت إشراف المعالج ليكي وخصوصا الحقن لأن ممكن يكون ليها أعراض جانبية خطيرة.
بمجرد مالطبيب يشخصك بأنيميا نقص الحديد لازم تبدأي تغيري نظامك الغذائي فورا بشكل صحي ويكون يحتوي على أطعمة فيها نسبة حديد عالية عشان ترجع نسبة الحديد للمعدل الطبيعي بتاعها في وقت أقصر. الأطعمة دي هي :
- الكبدة.
- اللحوم الحمراء.
- الفاصوليا ذي الفاصوليا الحمراء والفول والحمص.
- المكسرات.
- الفواكه المجففة ذي المشمش المجفف.
- حبوب الفطار.
- دقيق فول الصويا.
طرق إعادة إنبات الشعر مرة تانية
بيصرف مرضى تساقط الشعر في الولايات المتحدة أكتر من 3.5 مليار دولار على منتجات تساقط الشعر في حين أن 99 % من النتايج بتكون غير مرضية عشان كده أوصت إدارة الغذاء والدواء الأمريكية والمتخصصين الطبيين على ضرورة الالتزام بالعلاج مع الطبيب المتخصص.
العلاجات اللي أوصت بيها إدارة الغذاء والدواء الأمريكية والمتخصصين الطبيين هي : مينوكسيديل ( روجين ) minoxidil- أقراص فيناستيريد finasteride – جراحة زرع الشعر Hair trasplant surgery- أمشاط الليزر.
مينوكسيديل ( روجين ) minoxidil-1
في البداية كان المينوكسيديل minoxidil بيستخدم في علاج إرتفاع ضغط الدم لكن مع الوقت الأطباء والباحثين لقوا إن ليه آثار جانبية وهي زيادة كثافة الشعر وطول الشعر بشكل سريع وشكل مبالغ فيه. من هنا تم اعتماد مينوكسيديل minoxidil كعلاج لحالات الصلع الوراثي عند الرجال والنساء وفي حالات تساقط الشعر الحرجة.
تفاصيل أكتر
ببينتج عن استخدام المينوكسيديل minoxidil شعر أطول وعدد شعرات أكتر بعد الاستخدام واعتبروه آمن وفعال في علاج حالات الصلع الوراثي عند الرجال والسيدات وفي حالات تساقط الشعر الشديدة. نتايج المينوكسيديل minoxidil بتكون فعالة جدا في الحالات اللي أقل من 40 سنة.
اعتماد المينوكسيديل minoxidil كان من هيئة الأدوية و الغذاء FDA كعلاج لحالات الصلع الوراثي بس لقو بعد كده انها بتكون فعالة جدا في حالات تانية زي علاج الثعلبة البقعية والثعلبة الندبية وحالات اضطراب جذع الشعر. المينوكسيديل بيكون موجود في شكل سبراي أو لوسيون وبيكون موجود بتركيزات للرجال تركيز 5% و للسيدات بتركيز 2.5 %. يتم فرك فروة الراس باللوسيون أو الاسبراي مرتين يوميا عشان تعزز نمو الشعر ونوقف تساقط الشعر لمدة 16 أسبوع وممكن اننا نستخدمه أكتر من 16 أسبوع لفايدة أكتر ولكن تحت إشراف الطبيب المعالج.
إيه هي الآثار الجانبية لاستخدام مينوكسيدل minoxidil؟
- احمرار في الجلد.
- حساسية للمواد الفعالة.
- حكة وهرش.
- قشور بيضه أو قشور ليها لون أصفر.
- نمو شعر زيادة في الجسم وتحديدا في السيدات.
- مينوكسيديل minoxidil مش مناسب للسيدات الحامل والسيدات المرضعة. ناخد بالنا ان استخدامه لازم يكون تحت إشراف الطبيب المعالج مش استخدام منزلي.
أقراص فيناستيريد finasteride-2
- بيستخدم الدكاترة فيناستيريد لعلاج حالات الصلع الذكوري بس، أقراص فيناستريد بتستخدم لعلاج الصلع الذكوري عند الرجال بس ولا تستخدم للسيدات ، لانها بتشتغل عن طريق إنها بتقلل هرمون ال دايهدروتستوستيرون (DHT) المسبب للتساقط اللي بيكون موجود بنسبة عالية عند الذكور.
- غير مناسب للاطفال والحوامل والمرضعات.
أهم تفاصيل أقراص فيناستيريد finasteride
- بيستخدم الدكاترة فيناستيريد لعلاج حالات الصلع الذكوري بس، أقراص فيناستريد بتستخدم لعلاج الصلع الذكوري عند الرجال بس ولا تستخدم للسيدات ، لانها بتشتغل عن طريق إنها بتقلل هرمون ال دايهدروتستوستيرون (DHT) المسبب للتساقط اللي بيكون موجود بنسبة عالية عند الذكور.
- غير مناسب للاطفال والحوامل والمرضعات.
الآثار الجانبية لاستخدام فيناستيريد عند الرجال
- ضعف الانتصاب ، بيقلل الرغبة الجنسية ، بيقلل حجم السائل المنوي عند الذكور.
- موجودة في شكل حبوب فيناستيريد للرجال بتعمل على انبات الشعر ووقف تساقط الشعر.
جراحة زرع الشعر Hair transplant surgery-3
-
- يستخدم الأطباء جراحة زراعة الشعر عند الأشخاص اللي بتعاني من تساقط الشعر بشكل مستمر.
- بتكون عن طريق إزالة أجزاء من الجلد بتحتوى على شعر وزرعها في مناطق الصلع.
4- رابع طريقة علاج -أمشاط الليزر
-
- تعتبر أمشاط الليزر شكل جديد من طرق علاج تساقط الشعر عن طريق انها بتستخدم ضوء خفيف مركز بيحفز انبات الشعر مرة تانية.
- النتايج من إستخدام أمشاط الليزر لسه مأثبتتش فعالية لوحدها لكن بتستخدم مع طرق تانية كعامل محفز عشان ننبت الشعر مرة تانية.
في دراسة اتعملت عن آثار استخدام الليزر منخفض المستوى عند 32 سيدة ورجل مصابين بمرض الثعلبة الاندروجينية. الباحثيين لقو ان استخدام أمشاط الليزر مع الفيناستيريد finasteride والمينوكسديل minoxidil بتحفز نمو الشعر بشكل أفضل من لما استخدمو فيناستيريد finasteride أو مينوكسيديل minoxidil لوحدهم.
سبع خطوات هنمشي عليها عشان نمنع نقص الحديد وتساقط الشعر في المستقبل
لازم ناكل نظام غذائي صحي ومتوازن
النظام لازم يكون فيه أطعمة غنية بالحديد زي ( السبانخ والبسلة والبروتين الخالي من الدهون والفواكه المجففة ذي المشمش المجفف ) ، لو هناكل أطعمة معلبة لازم نتأكد ان العبوة مكتوب عليها مدعم بالحديد.
ناكل أطعمة تحتوي على نسبة عالية من فيتامين سي vitamin C
الأطعمة اللي بتحتوى على فيتامين سي vitamin c ضروري جدا تكون موجوده في النظام الغذائي لانه بيساعد على امتصاص الحديد ذي البرتقال والفراولة والبطيخ والبروكلي والطماطم.
اربطي شعرك لتحت وما تشديش شعرك بشريط الشعر أو التوك
شد الشعر بالتوك ورفعه لفوق بيزود تساقط الشعر عشان كده اربطي شعرك بشكل خفيف لتحت أو سيبي شعرك وده هيساعد أنه يحمي شعرك من التساقط.
احمي شعرك وما تستخدميش سكارف أو قبعة الا للضرورة
ممكن نستخدم القبعات أو السكارف في الأيام المشمسة أو وقت الرياح الشديدة عشان نحمي شعرنا من العوامل الخارجية.
اغسلي وسرحي شعرك بلطف
وده بيساعدنا أننا نحافظ على الشعر من التساقط وأننا ممكن نشد أي شعر زياده أثناء عمل روتين الشعر.
تجنبي إستخدام المواد الكيميائية والصبغات على شعرك
في حالة استخدام الصبغات أو أي مواد كيميائية تانيه لازم نوقف استخدامها فورا لانها مضرة للشعر وبتزود التساقط.
تجنبي استخدام الأدوات اللي بتعتمد على الحرارة زي المكوة الكهربائية أو السشوار
في حالة انك بتستخدمي مكوة كهربائية أو سيشوار، لازم تستخدمي طبقة عازلة تحمي شعرك من الحرارة ذي موس واقي الشعر اللي ممكن تشتريه من أي صيدلية قريبة منك أو تطلبيه من أي موقع تجميلي موثوق المصدر.
اسئلة ممكن تيجي في بالك دلوقتي
امتى تشوفي نتيجة بعد علاج نقص الحديد في الجسم ؟
- لو كان تساقط الشعر السبب فيه هو نقص الحديد ، هنقدر نشوف نتيجة بمجرد ما نسب الحديد تبدأ ترجع للمعدل الطبيعي وده بياخد وقت حوالي 3 أشهر.
- نقدر نستخدم في الفترة دي علاجات عشان نعمل على إنبات الشعر المتساقط مرة تانية زي المينوكسيديل minoxidil ( روجين ) ( rogain ) تحت إشراف طبي.
- الدراسات لقت إن 59 % من السيدات اللي بيعانوا من تساقط الشعر بيكون السبب هو نقص الحديد وبالتالي بمجرد ما بنبدأ نعالج نقص الحديد في الجسم ونسب الفيريتين ferritin تبدأ ترجع للمعدل الطبيعي في الجسم بيقف تساقط الشعر.
إمتى نتواصل مع طبيب متخصص؟
خمس حالات مجرد ما تحصل لازم نتواصل مع طبيب متخصص فورا هي :
- تساقط الشعر فجأة.
- تساقط الشعر بشكل مبالغ فيه وانتي بتسرحي أو على المخده أو وانتي بتستحمي.
- تساقط كتل من الشعر.
- حكة أو هرش أو حرقان في فروة الراس.
- لو حسينا بأي أعراض من أنيميا نقص الحديد زي :
- تعب ونقص في الطاقة.
- ضعف في الأظافر.
- خفقان القلب وزيادة ضربات القلب.
- صداع.
- شحوب في لون البشرة.
- تساقط الشعر.
ازاي تتعاملي مع تساقط الشعر؟
- لحسن الحظ ان علاج تساقط الشعر الناتج عن نقص الحديد بيكون سهل التعافي عن علاج تساقط الشعر الناتج عن الخلل الهرموني.
- تساقط الشعر بيزيد في حالات الحمل والرضاعة بسبب نقص فيتامين الحديد فلازم تتابعي مع الطبيب المتخصص عشان تمشي على نظام غذائي مناسب و مكملات غذائية في حالات نقص الحديد.
- تساقط الشعر بيأثر عاطفيا بشكل كبير على اللي بيتصابوا بيه ، ويختلف التأثير ده من شخص للتاني.
- تساقط الشعر بيؤثر على المصاب بيه بشكل ممكن يخليه يوصل لإكتئاب وبيدهور حياته بشكل كبير جدا.
- لازم أولا نزور طبيب جلدية متخصص في تساقط الشعر وهو هيوجهنا للخطوات اللي بعد كده.
- لازم لو تساقط الشعر وصلك لاكتئاب شديد انك تطلبي الدعم النفسي فورا عشان ميأثرش على حياتك بشكل مبالغ فيه.
- لازم تعرفي إن التساقط ليه علاجات وبتكون نتيجتها فعالة جدا فما تقلقيش وحاولي تحسني من حالتك النفسية لحد ما تتواصلي مع الأطباء المتخصصين.
المصادر
ضيفي أول ريڤيو عن “فيتامين الحديد وتأثيره على تساقط الشعر”