كل اللي محتاجة تعرفيه عشان تطوّلي شعرك بقوة ولمعان
عملية نمو الشعر عملية مركبة، بتتحكم فيها عوامل كتيرة، وده هيخلينا نتكلم في أكتر من اتجاه لما يكون الموضوع متعلق بطرق تطويل الشعر.
لكن في الأول ” ازاي بيطول الشعر “؟
بتحتوي كل بصيلة على جذر الشعر اللي بيتكون من خلايا بروتينية، وأثناء دوران الدم في كل الجسم بيوصل الأكسجين والمواد الغذائية اللي بتحتاجها الخلايا البروتينية للتكاثر، ولما بتتكاثر بتبني الشعر اللي بيخترق الجلد ويبدأ يطوَل، وأثناء نمو الشعر بيمر بغدة دهنية بتمده بالزيوت الطبيعية اللي بتديله نعومته ولمعانه.
الشعر بيطول بمعدل 0.5 – 1.7 سم كل شهر، وبعد وصوله لطول معين، بيبتدي يموت وينمو تحته شعر جديد بيزق الشعر الميت من الجلد ويحصل تساقط الشعر، وبيكون معدل التساقط الطبيعي اليومي 50 – 150 شعرة.
الجينات والعوامل الوراثية هي اللي بتتحكم في المعدل اليومي لنمو الشعر، وهي كمان اللي بتتحكم لأقصى طول الشعر بيوصله قبل ما يبتدي يتساقط طبيعياً عشان يحل محله الشعر الجديد، بمعنى إن الجينات هي اللي بتخلي شعر حد بيطول أسرع أو بيكون أطول من شعر حد تاني، لكن ده مايمنعش إن فيه طرق وتكنيكات ممكن تساعد في زيادة معدل نمو الشعر فيطول بشكل أسرع، أو تحتفظ بيه في فروة الراس لمدة أكتر قبل ما يبتدي يتساقط، فتخليه أطول.
كمان الشعر بيطوَل بأقصى معدل ليه في سن 15 – 30 سنة، بعد كده إنتي محتاجة طرق تساعدك تحتفظي بمعدل نموه الطبيعي، وتحافظي كمان على قوته ومرونته ولمعانه.
طرق تطويل الشعر
1- كُلي صح
أول خطوة في طريق العناية بصحة وجمال شعرك هو الأكل الصحي، ومانقصدش هنا السوتيه، إحنا بنتكلم عن الأكل المتوازن اللي بيحتوي على العناصر الغذائية الضرورية لنمو شعر صحي، فلازم تتأكدي إن أكلك اليومي بيحتوي على:
البروتين والبيوتين
البيوتين هو جزء من مجموعة فيتامينات ب المركبة اللي بتساعد في تحويل الأكل لطاقة بيستخدمها الجسم في عملية التمثيل الغذائي للحصول على الأحماض الأمينية اللي هي وحدات بناء البروتين، وزي ما قلنا إن الشعر بيبدأ نموه من الجذور اللي بتتكون بالأساس من خلايا بروتينية.
فلو عاوزة شعرك يطول أسرع لازم تدخلي حاجات زي البيض والفول ومنتجات الألبان واللحوم أو الطيور لأكلك اليومي لأنها غنية جداً بالبروتين والبيوتين.
الحديد والزنك
المعادن دي ضرورية لإنتاج البروتين اللي بيحتاجه الشعر، ونقص الحديد من أشهر أسباب تساقط، عشان كده دخلي أكلات زي السبانخ والفول والمكسرات في وجباتك اليومية لأنها غنية بالحديد والزنك المهمين لشعرك.
أحماض أوميجا-3 الدهنية
مش كل الدهون ضارة بصحتك، بالعكس فيه دهون صحية مفيدة جداً لوظايف جسمك ولصحة ولمعان شعرك، أهمها أحماض الأوميجا اللي هتلاقيها في الأفوكادو والمكسرات والسلمون وزيت بذور الكتان، فاهتمي بالأكلات دي مرتين كل أسبوع على الأقل.
المكملات الغذائية
- ممكن تساعدك كتير في اختصار الطريق، مش معنى كده إنك تعتمدي عليها كبديل للأكل الصحي، بس هي هتقصر عليكي وقت في الأول لحد ما جسمك يتشبع بالعناصر الغذائية، وبعد كده تقدري تستغني عنها طالما محافظة على الأكل الصحي المتوازن.
- كبسولات بريورين Priorin Capsules
- أقراص بيرفكتيل Perfectil Tablets
- كبسولات بانتوجار Pantogar
- أقراص نيوتريشن فور يور هير Nutrition For Your Hair
اشربي مياه كتير
جسمك لو بيعاني من الجفاف، ده معناه إن شعرك هيكون متعرض أكتر للهيشان والتكسر والتساقط، عشان كده شرب المياه ضروري جداً لسرعة تطويل الشعر، وهتشوفي أثره بسرعة على حيوية شعرك وحتى على نضارة بشرتك.
حاولي تعملي لنفسك تارجت يومي شرب 2 – 3 لتر مياه، وممكن يساعدك على تحقيقه إنك توقفي شرب المشروبات الغازية، أو تضيفي نكهات خفيفة للمياه زي حبات الراسبري أو شرايح البرتقان.
2- غيري طريقتك في العناية بشعرك
اختاري المكونات اللي هتحطيها في شعرك
مهم جداً إنك تقري المكونات المكتوبة على عبوات منتجات العناية بالشعر، وإنك تبقي عارفة إيه المواد اللي ممكن تفيد شعرك وإيه المكونات اللي ممكن تضره.
مواد زي السلفات والبارابين والسيليكون والكحول والملونات ممكن تؤذي شعرك وتأثر بشكل كبير على معدل نموه، فحاولي تبعدي عنها قد ما تقدري، وعلى العكس فيه مكونات تانية كتير بتعزز نمو الشعر وبتحميه من التساقط هتساعدك في تطويل شعرك.
وتقدري تعرفي أكتر عن المواد الفعالة والمنتجات اللي بتساعد على تطويل الشعر من هنا.
شامبو أقل وبلسم أكتر
مفيش شك إن نضافة الشعر وفروة الراس حاجة أساسية لشعر قوي وصحي، لكن كمان المبالغة في غسيل الشعر بيجرد الشعر من زيوته الطبيعية وبيخل بمستوى الـ PH في فروة الراس، فبيعرضه للجفاف والتكسر.
كمان فكرة استخدام كمية كبيرة من الشامبو -حتى لو كان شامبو طبي أو لطيف على الشعر- عاملة بالظبط زي فكرة “لو شربت إزازة الدوا مرة واحدة هخف أسرع”، بمعنى إن الكمية الكبيرة مش هتنضف شعرك أكتر لكن ممكن تتجفف شعرك أكتر.
وبكده نقدر نقول إنك هتحتاجي تغسلي شعرك بشامبو مناسب مرة واحدة في الأسبوع لو شعرك جاف أو عادي ومرتين لو شعرك دهني، وبأقل كمية ممكنة على حسب طول شعرك وكثافته.
على العكس تماماً استعمال البلسم وحمامات الكريم، لأن الترطيب يُعتبر أهم عوامل تطويل الشعر، وده لأن ببساطة الشعر اللي بيكون محتاج للترطيب ومش بيحصل عليه فبيكون عرضة أكتر للتكسر والتقصف وكمان التساقط، وبالتالي مش بيطول، وعشان كده لازم تستخدمي البلسم بعد كل مرة شامبو، وتقدري كمان تستخدميه مباشرة أثناء الشاور من غير ما تستخدمي شامبو طالما شعرك وفروة راسك نضاف، وكمان لازم تستخدمي حمامات الكريم مرة أو مرتين أسبوعياً.
بلاش المياه السخنة
صحيح المياه السخنة مهمة لفتح المسام وتنضيف البصيلات، لكن المبالغة في زيادة حرارة المياه ممكن تجفف شعرك جداً وتفقده كل مرطباته، عشان كده حاولي دايماً تقللي درجة حرارة المياه على قد ما تقدري تتحملي، ولو غسلتي شعرك بمياه دافية لازم تكون الشطفة الأخيرة بمياه باردة عشان تقفلي مسام فروة الراس، حتى لو هتكون الشطفة الأخيرة دي في الحوض مش تحت الدش.
نشفيه بمايكروفايبر
بلاش أبدًا تبرمي شعرك جوة الفوطة القطن وترفعيه على راسك من فوق، الكومبو الثلاثي دا بيعرض شعرك المبلول للتكسر بمنتهى السهولة، وهيبقى همك بعد كده إزاي تعالجيه وتمنعي تساقطه بدل ما هتفكري إزاي تطوليه.
استعملي الفوط المايكروفايبر أو التيشرتات القطن القديمة -طالما نضيفة- لتنشيف شعرك بعد الغسيل، واضغطي على الخصلات بلطف عشان تمتصي منها المياه بدون فرك أو عصر.
ازاي هتسرحيه، وازاي هتلميه
الشعر المبلول بيكون في أضعف حالاته، وأي تعامل قاسي معاه بتكون نتيجته التكسر والتساقط، عشان كده زي مانشفتي شعرك بالراحة، لازم كمان تفكي تشابكاته وتلميه بالراحة.
أفضل طريقة إنك تفكي تشابكاته بصوابعك باستخدام كريم مرطب أو سيروم، وبعد ما ينشف شوية ممكن تسرحيه باستخدام إما مشط خشب واسع الأسنان أو فرشة أسنانها بلاستيك مدورة وقاعدتها فيها فتحات للتهوية، ودايماً ابدئي من أطراف شعرك واطلعي لفوق شوية.
لو هتقدري تسيبيه بحريته يكون أفضل، أما لو لازم تلميه فابعدي تماماً عن أي تسريحات تشد شعرك عشان مايضعفش ويقع من جذوره، وببلاش ديل الحصان أو الضفيرة المرفوعين، اتعودي تعمليهم نازلين على ضهرك من غير شد ومن غير ما تضيقي عليهم التوك وأساتك الشعر اللي يفضل يكونوا من الستان.
سيبي شعرك في حاله
بلاش سيشوار إلا لو عندك مناسبة خاصة، بلاش مكواة، بلاش معالجات تجعيد أو فرد، بلاش صبغات، بلاش تكتفيه بالتسريحات واكسسوارات الشعر الضيقة، بلاش حركة لف الشعر حوالين الصوابع.
لو بطلتي أو حتى قللتي بشكل كبير من الحاجات دي، شعرك هيرجع صحي من تاني وهيستعيد قدرته على النمو بشكل طبيعي.
قصي أطراف شعرك
الشعر بيطول من الجذور، وبالتالي أطراف الشعر بتكون أقدم جزء فيه، اللي اتعرض للعوامل اللي بتتلف الشعر لوقت أطول، فبتبدأ تتكسر وتتقصف، عشان كده قص أطراف الشعر بصورة منتظمة هيحمي خصلات شعرك من انتشار التقصف بطولها، وهيخلي شعرك شكله أجمل وصحي أكتر، وهيطول بشكل أوضح.
نامي على الحرير والستان
النوم لفترات كفاية بيساعد في إنتاج هرمون الميلاتونين اللي بينظم نمو الشعر، لكن فترة النوم بيكون فترة احتكاك مستمر بين خصلات شعرك وبين بعضها وبين أنسجة غطا المخدة بالذات لو كان شعرك طويل، عشان كده هيكون مفيد جداً لشعرك استبدال أكياس المخدات القطن بأكياس حرير أو ستان، ده هيقلل الاحتكاك بشكل كبير، وبالتالي هتحمي شعرك من التكسر وتساعديه إنه يطول أسرع، ولو بشرتك بتتحسس من الألياف الصناعية، ممكن تستخدمي بونيه ستان أو تلفي شعرك بإيشارب حرير أثناء النوم.
كمان بلاش تنامي وشعرك مبلول، لأن زي ما قلنا الشعر المبلول بيكون ضعيف جداً، واحتكاكه المستمر مع المخدة هيضعفه أكتر ويعرضه للتساقط.
احمي شعرك وإنتي بره
وإنتي بره البيت شعرك بيتعرض لعوامل مختلفة بتأثر عليه بشكل مباشر، زي أشعة الشمس الضارة، والتلوث، والهوا الشديد، والأتربة، فحاولي تحمي شعرك لو خارجة في أماكن فيها العوامل الضارة دي.
بمعنى لو هتقضي وقت طويل في الشمس، أو رايحة مكان فيه تعرض كبير للملوثات، حاولي تلبسي كاب أو تلفي شعرك بسكارف عشان تحميه وتحافظي عليه.
كمان ماتنزليش حمام السباحة أبداً من غير كاب السباحة، لأن الكلور اللي في المياه بيسبب تلف كبير للشعر.
3- اهتمي بفروة راسك زي ما بتهتمي ببشرتك
فروة الراس هي القاعدة اللي بتضم بصيلات الشعر والأوعية المغذية ليها والغدد والأعصاب والكولاجين وألياف الإيلاستين والخلايا الدهنية، والإعتناء بيها زي الاعتناء بتربة النبات هتؤدي لشعر أطول وأكتر صحة وكثافة.
- زي ما بتكوني حريصة إنك تختاري الغسول المناسب لبشرتك، اختاري برضه الشامبو المناسب اللي يخلّص فروة راسك من الأوساخ والأتربة والزيوت الزيادة وتراكمات المواد المختلفة اللي بتسد بصيلات الشعر، فتديها فرصة إنها تتنفس وفي نفس الوقت يكون لطيف عليها ما يتسببش في تجفيفها أو تجفيف شعرك.
- حاولي دايمًا تستخدمي منتجات بتحتوي على مواد زي حمض الساليسيلك وأحماض ألفا هيدروكسي، عشان تتخلصي من خلايا الجلد الميتة بطريقة لطيفة من غير ما تؤذي خلايا فروة راسك، وزي الكافيين اللي بيحفز نمو الشعر عن طريق تحسين الدورة الدموية وتثبيط هرمون DHT المسؤول عن تساقط الشعر، وكمان مضادات الأكسدة والالتهابات زي مستخلصات الشاي الأخضر وزيت الروزماري واللافندر والنعناع.
- اهتمي بترطيبها زي ما بتهتمي بترطيب خصلات شعرك، وخليكي حريصة على عمل ماسكات لفروة الراس بشكل دوري.
- لو فروة راسك بتعاني من أي أمراض أو التهابات أو تهيج لازم علاجها يكون أول أولوياتك، لأن مستحيل هتحصلي على شعر طويل وصحي إلا لو فروة راسك صحية وسليمة.
جربي طريقة Inversion Method
تدليك فروة الراس بيزود تدفق الدم لبصيلات الشعر، فبيسهّل إمدادات الأكسجين والمواد الغذائية، ويساعد في الوصول لشعر قوي وطويل وكثيف، وكمان بيساعدك على الاسترخاء والتخلص من التوتر اللي بيأثر بالسلب على شعرك.
والتدليك ممكن يكون باستخدام “مدلك فروة الراس السلك” أو بأطراف صوابعك ببساطة، وممكن تستعيني بمستخلص القهوة أو الزيوت الطبيعية زي زيت الزيتون أو زيت جوز الهند أو زيت الجوجوبا أو زيت الأرجان، وممكن تستغني عنهم.
ممكن تدلكي فروة راسك بشكل يومي لمدة 5 دقايق وتخليها عادة يومية ليكي، وممكن تجربي طريقة Inversion Method اللي غالبا هتفرق معاكي جداً:
- قصي أطراف شعرك عشان تتخلصي من التقصف اللي ممكن يقلل من النتايج.
- قيسي طول شعرك بالمازورة عشان تقدري تقارني بين طوله قبل وبعد.
- اقعدي على كرسي واقلبي شعرك لقدام بحيث تكون راسك في مستوى رجليكي، ويكون مستوى قلبك أعلى من مستوى راسك، زي ما بيحصل في بعض تمارين اليوجا.
- دلكي فروة راسك بأطراف صوابعك لمدة 5 – 10 دقايق، ولو استعنتي بالزيوت في التدليك سيبيها على فروة راسك ساعتين قبل ما تغسليها.
- كرري العملية دي كل يوم لمدة أسبوع، وبيعدين ريحي شهر، وارجعي كرريها تاني.
4- جربي الوصفات المنزلية
صحيح مفيش زيت سحري هيطول شعرك من أول مرة استخدام، لكن ده ماينفيش حقيقة إن الوصفات المنزلية بتساعد كتير في نمو شعر صحي وقوي، ده طبعاً كجزء من روتين عناية متكامل بيشمل الأكل الصحي واستخدام المنتجات المناسبة بطريقة مظبوطة.
الزيوت
ومن أمثلة الزيوت المهمة للشعر:
زيت بذور القرع العسلي
فيه دراسة لقت زيادة ملحوظة في نمو الشعر عند أشخاص بيعانوا من الصلع الأنثوي بعد 3 شهور من استخدامه.
زيت الجوجوبا
ليه خصائص مضادة للفطريات, وغني بفيتامين E وأحماض أوميجا 6 و 9 الدهنية.
زيت الروزماري
مضاد للميكروبات والفطريات, وبيساعد على منع الجذور الحرة من إتلاف الشعر.
زيت الخروع
بيحتوي على حمض الريسينوليك المرطب، وأحماض أوميجا 6 الدهنية.
زيت جوز الهند
مضاد للميكروبات والفطريات, وبيساعد على منع الجذور الحرة من إتلاف الشعر.
الزيوت العطرية: زي اللافندر والنعناع وشجرة الشاي والبابونج والزعتر ومستخلص التوم بتساعد على زيادة الدورة الدموية في فروة الراس، وأظهرت نتايج ملموسة في حالات تساقط الشعر، ويُفضل إنك تخلطيها بزيت ناقل زي زيت جوز الهند أو الخروع أو الزيتون.
مش بس الزيوت اللي ممكن استخدامها في الوصفات المنزلية، لكن فيه كمان مكونات كتير مفيدة لصحة شعرك، وموجودة في كل بيت زي
البيض
غني بالبيوتين وفيتامين أ و د وحمض الفوليك.
العسل
مرطب، ومضاد للبكتريا، وبيحفز نمو الشعر، وبينضف البصيلات، ومضاد للأكسدة.
القهوة
غنية بالكافيين ومضادات الأكسدة، بتحفز نمو الشعر، وبتساعد على تقليل الشعر الأبيض
خل التفاح
مضاد للفطريات والبكتريا، وبيزيل تراكمات المنتجات على شعرك وفروة راسك.
ماء الأرز
غني بمضادات الأكسدة والمعادن وفيتامين E ومادة الإينوزيتول اللي بتحمي وبتمنع تلف الشعر
الصبار
بيهدّي فروة الراس، وبيعزز نمو شعر قوي وصحي.
الفازلين
بيغلف خصل الشعر فيحميها من الاحتكاك اللي ممكن يعرضها للتكسر، وبيحمي أطراف الشعر من التقصف.
ودي أمثلة لوصفات منزلية ممكن تجربيها وتقوليلنا مين فيهم لاحظتي إنها ساعدت في تطويل شعرك:
وقت التحضير
5 دقائق
هدفه
ترطيب البشرة
ماسك الجيلاتين، هل فعلا بيفتح البشرة وبيشيل الرؤوس السودا؟
وقت التحضير
5 دقائق
هدفه
تقشير الجلد الميت
تقشير الوجه بالقهوة، مفيد لبشرتك ولا لأ؟ وإيه رأي المتخصصين؟
وقت التحضير
5 دقائق
هدفه
تقشير الجلد الميت
ماسك القهوة والنشا لترطيب وتفتيح البشرة والتخلص من الجلد الميت
5- العلاجات الموضعية ممكن تساعدك
أحياناً بتحسي إنك عملتي كل حاجة وبرضه شعرك مش بيطول بالمعدل الطبيعي، أو الأكتر من كده ممكن كمان يكون شعرك بيتساقط ومش عارفة توقفي ده، ساعتها لازم تلجئي لدكتور مختص يساعد تعرفي إيه من العلاجات الموضعية ممكن يساعدك.
العلاجات الموضعية لعلاج تساقط الشعر أو لزيادة نموه كتيرة ومختلفة، منها مثلاً:
الدهانات الموضعية
فيه أنواع مراهم ولوسيونات طبية كتير في الصيدليات بتحتوي على مواد فعالة بتلعب دور واضح في تنظيم عملية نمو الشعر، زي مثلاً:
بيقلل تساقط الشعر، وبيزوّد مرحلة النمو النشط في دورة حياة الشعر.
6- الإجراءات التجميلية حلك الأسرع
إحنا هنا مش بنتكلم عن طرق طبيعية لتطويل الشعر، ولكن بنتكلم عن حيل تجميلية تديكي شكل الشعر الطويل اللي انتي عاوزاه في مجرد ساعات قليلة هتقضيها في صالون التجميل.
بتختلف أشكال وطرق تطويل الشعر في الصالون، وتقدري تختاري الأريح بالنسبالك، فهتلاقي مثلاً:
الباروكة
أسرع وأسهل طريقة تغيري بيها شكل شعرك من حيث الطول والكثافة واللون، ومالهاش تقريباً أي أضرار على عملية نمو الشع
الإكستنشن
وفيه منه اللي بيتثبت بكليبسات، أو بيتخيط في خصل شعرك، أو بيتلزق في فروة راسك، ومهما كان النوع اللي هتختاري مهم جداً إن طريقة تثبيته ماتكونش مشدودة وماتسببش تهيج في فروة الراس أو ألم في جذور الشعر علشان ماتتلفش شعرك الطبيعي وتسبب تساقطه.
مهم كمان إنك ما تستخدميهاش أكتر من 2 – 3 شهور وبعدين تريحي شعرك شوية قبل ما تكرريها تاني، وكمان مهم إنك ما تسحبيهاش بنفسك أبداً عشان شعرك مايتقطعش واستعيني بخبير في تركيبها وفكها عشان تحافظي على شعرك الطبيعي.
5 حاجات تبعدي عنها لو عاوزة شعرك يطوَل بسرعة:
االمصادر
ضيفي أول ريڤيو عن “كل اللي محتاجة تعرفيه عشان تطوّلي شعرك بقوة ولمعان”