في 6 خطوات بس، إزاي تطبقي الماسكات على بشرتك صح
بتعرفي ازاي تستخدمي ماسك البشرة بتاعك بالطريقة الصح؟
ماسكات البشرة هي واحدة من الحاجات اللي مكنتيش تعرفي أبدًا إنك محتاجاها إلا بعد ماشوفتي نتايجها، ولو استخدمتيها بشكل صحيح، فممكن تساعدك في علاج مشاكل كتير في بشرتك، ولأن معظمها مريح في استعماله، فهي هدية لطيفة تكافئي بيها نفسك في نهاية يوم مرهق.
بسبب إن الماسكات الورقية سهلة جداً في الاستخدام، بدأت شعبية ماسكات البشرة تتزايد بشكل عام، وأصبح موجود منها أشكال وخامات كتير جداُ، وممكن تحسي بالحيرة وانتي بتحاولي تختاري منها اللي يتناسب معاكي ومع بشرتك، عشان كده في المقال ده هنحاول نساعدك تتعرفي أكتر على عالم ماسكات البشرة، وطرق استخدامها المختلفة.
هل ماسكات البشرة مفيدة فعلاً ولا مجرد تريند؟
وكمان ماسكات البشرة ليها فوايد تانية زي إنها:
بتديكي إحساس ممتع بالاسترخاء
التوتر اليومي والإجهاد من الأسباب الرئيسية لمشاكل الشعر والبشرة زي تساقط الشعر وظهور الحبوب، وده بسبب زيادة إفراز هرمون الكورتيزول، وعشان كده مهم إنك تقللي من إحساسك المستمر بالضغوط والمسئوليات اليومية، وتخصصي وقت يكون ليكي إنتي وبس.
بتقوي مفعول منتجات روتينك اليومي
الماسكات بتساعد منتجات العناية بالبشرة إنها تُمتص بشكل أعمق وبالتالي بتشتغل بكفاءة أكبر، فتوصلي للنتايج اللي عايزاها بطريقة أسرع.
الماسكات بتساعد منتجات العناية بالبشرة إنها تُمتص بشكل أعمق وبالتالي بتشتغل بكفاءة أكبر، فتوصلي للنتايج اللي عايزاها بطريقة أسرع.
أنواع ماسكات البشرة
بتختلف ماسكات البشرة على حسب الخامات المصنوعة منها والمواد الفعالة المضافة ليها واللي بتحدد فوايدها، وأصبح موجود منها دلوقتي تشكيلة كبيرة جداً بتغطي كل الاحتياجات اللي ممكن أي حد يدوّر عليها في ماسك للبشرة.
أنواع الماسكات حسب المادة الفعالة:
مشكلة البشرة اللي الماسك هيحلها هي اللي بتحدد المواد الفعالة اللي هتتضاف ليه، وبالتالي بتختلف انواع الماسكات على حسب وظيفتها:
1- ماسكات التنظيف
2- ماسكات الترطيب
بتفيد في حالات البشرة المجففة، لأنها بتجبر مواد الترطيب إنها توصل لطبقات أعمق في البشرة، فبتقدر البشرة تحتفظ بالترطيب لفترات أطول، والترطيب الفائق ده بيدي البشرة النضارة، غير إنه بيسهل توزيع المكياج بشكل متجانس.
3- ماسكات التفتيح وتوحيد لون البشرة
4- ماسكات شد البشرة وتقليل الخطوط
ترهل البشرة بيخلي شكلك يبان أكبر من سنك، والماسكات دي بتحتوي على مضادات للأكسدة بتساعد على تقليل أضرار الجذور الحرة اللي بتسببها عوامل زي التلوث وأشعة الشمس، واللي بتضر خلايا بشرتك وبتسبب ظهور الخطوط والتجاعيد والتصبغات، غير إنها كمان بتعزز إنتاج الكولاجين اللي بيملى بشرتك ويشدها وبيوحد ملمسها.
5- ماسكات تصغير شكل المسام
المسام مهمة لأنها بتحافظ على صحة البشرة، وبتخلصها من السموم، وبتنظم درجة حرارة الجلد، لكنها لما بتكون أوسع من المفروض بتكون مزعجة جداً في شكلها، غير إنها بتلم الشوائب والدهون الزيادة وتجمعهم جوة البشرة، وده بيسبب مشاكل بعد كده زي ظهور الحبوب.
واستخدام ماسكات طمي البنتونيت والكاولين بيكون مفيد في حالات المسام الواسعة، ده لأنها بتمتص الدهون الزيادة، وتخلص البشرة من الشوائب وخلايا الجلد الميت، وليها القدرة على قبض المسام وشدها فبتخليها تبان أصغر في الحجم.
6- ماسكات امتصاص الدهون الزيادة
البشرة الدهنية بتعاني من الإنتاج الزيادة للدهون اللي بيتم إفرازها بشكل طبيعي لحمايتها وترطيبها، والزيادة دي غالباً بتكون بسبب الهرمونات، بالتالي مفيش منتج ممكن يحل المشكلة دي نهائياً، لكن الماسكات تقدر تساعد في امتصاص الدهون الزيادة وتنظيم إنتاجها وتحسين ترطيب البشرة الطبيعي، بالذات ماسكات الطين والفحم، لكن لازم نأكد على إن الترطيب بعد استخدامهم ضرورة ماينفعش تهمليها.
أنواع الماسكات حسب الخامة
المادة الفعالة في الماسك هي اللي بتحدد الخامة اللي هيتصنّع منها وبالتالي الطريقة اللي هيتطبق بيها على البشرة، لضمان أقصى استفادة ممكنة، عشان كده عندنا تنوع كبير جداً في أنواع ماسكات البشرة، فهتلاقي:
1- الماسكات الورقية SHEET MASKS
أسهل أنواع الماسكات من حيث الاستخدام، وأكتر نوع عملي تقدري تعتمدي عليه خاصةً في السفر، والنوع ده بيكون مناسب جداً لتطبيق مثالي لأنواع السيروم المختلفة على البشرة، ده لإن طبيعة تصميمه بتغطي البشرة تماماً “زي البطانية” بحيث إن مكونات الماسك مش ممكن تتسرب منه إلا للبشرة، فبيكون مناسب جداً لحل مشاكل زي جفاف البشرة، والالتهابات، والخطوط الخفيفة.
وبتختلف خامات تصنيع النوع ده من الماسكات بين الشركات، فموجود منه:
الشيتات القطنية
أكتر نوع منتشر من الشيتات الورقية، بيكون الشيت مغموس في السيروم جوة العبوة، والبشرة بتتشرب السيروم ده تماماً لما بتحطي الشيت عليها، ومن أمثلتها شيت ماسك غارنييه سكين أكتف بالفحم
شيت ماسك غارنييه سكين أكتف بالفحم – GARNIER SKINACTIVE Super Purifying Charcoal Facial Mask
شيتات الهيدرو-جل
عاملة زي طبقة جل سميكة، بتكون متشبعة تماماً بالسيروم، وبتقدر تستوعب كميات أكبر من المادة الفعالة، ومن أمثلتها ماسك نيتروجينا فيرنس بوست هيدروجل
Neutrogena Fairness Boost The Illuminator Hydrogel Mask – نيتروجينا فيرنس بوست هيدروجل ماسك
شيتات البيوسليلوز
ودي عبارة عن مادة طبيعية امتصاصها عالي جداً، والنوع ده بيقدر يخزن ويقدم أعلى تركيز ممكن من المواد الفعالة، غير إن فيه ميزة إنه بيقدر يلزق على الجلد بإحكام فمش بيدي فرصة للمكونات إنها تتبخر للهوا بسرعة.
2- ماسكات الفحم CHARCOAL MASKS
الحقيقة إن الأدلة اللي بتشجع على استخدام الفحم في ماسكات البشرة مش كتيرة، والمبدأ اللي بتعتمد عليه النوع ده من الماسكات هو إن زي ما الفحم النشط ليه قدرة على امتصاص السموم جوة الجسم، فممكن برضه يكون ليه قدرة على امتصاص الدهون الزيادة من البشرة الدهنية وإزالة الشوائب.
وعشان كده البعض بينصح باستخدام ماسكات الفحم كعلاج ثانوي في حالات حب الشباب، لأنها ممكن تساعد في تقليل التهاب البشرة واحمرارها.
3- ماسكات الطين
هي ماسكات كريمية القوام وغنية بالمعادن المنشطة للبشرة، المادة الأساسية فيهم هي طمي الكاولين أو البنتونايت، بخصائصهم الماصة والقابضة والمقشرة، وبالتالي الوظيفة الأساسية للنوع ده من الماسكات هي التنضيف العميق، وإزالة الشوائب، وفيه منها نوعين:
CLAY MASKS
مناسبة لامتصاص وتجفيف الدهون الزيادة، وعلاج الأمراض الجلدية المتكررة زي الالتهابات والحبوب، عشان كده هي مناسبة أكتر للبشرة الدهنية والمعرضة لحب الشباب.
MUD MASKS
بتناسب أكتر البشرة الجافة والحساسة، لأنها بتعتمد أكتر على المياه، فبتكون مرطبة أكتر للبشرة.
4- ماسكات التقشير
مهمتها الأساسية إزالة خلايا الجلد الميتة وتجديد البشرة، وبتعتمد في ده على المقشرات الكيميائية اللي بتدوّب وتزيل الخلايا المتراكمة على سطح البشرة، وبالتالي الماسكات دي بتساعد كمان في توحيد لون البشرة، وبتخليها منورة وناعمة أكتر.
ومن المقشرات الكيميائية اللي بتُستخدم في ماسكات التقشير:
أحماض ألفا هيدروكسي
زي حمض الجليكوليك وحمض اللاكتيك.
أحماض بيتا هيدروكسي
زي حمض الساليسيلك.
إنزيمات الفاكهة
زي الإنزيمات المشتقة من البابايا و الأناناس.
وفيه نوعين من الماسكات دي:
Exfoliating Masks
ودي في الغالب بتتوزع على البشرة وبتتغسل أو تتفرك بعد مدة معينة.
PEEL-OFF MASKS
ودي بتكون اختيار أفضل لو مش بتحبي الفوضى اللي ممكن تحصل بسبب فرك الماسك، لأنها لما بتنشف على البشرة بتكوّن غلاف زي المطاط، بتقشريه بسهولة وبيشد معاه الخلايا الميتة والشوائب السطحية من البشرة.
لكن خدي بالك لو بشرتك حساسة بزيادة، الماسكات دي مش هتكون ألطف حاجة بالنسبالك، لإن ممكن يكون ليها تأثيرات مجففة للبشرة.
5- ماسكات الكريم CREAM MASKS
هي ماسكات بقوام غني ومرطب، ومثالية للبشرة الجافة بالذات لو قوامها تقيل، وسهل تلاقي فيهم كل الفوايد اللي بتدوري عليها سواء التغذية أو التقشير أو الترطيب حسب المادة الفعالة المضافة لقاعدة الكريم، فمثلاً الماسكات اللي بتحتوي على حمض الهيالورونيك بتكون للترطيب العميق، أما الماسكات الغنية بفيتامين سي بتكون لنضارة البشرة وتوحيد لونها، وفيه كمان منها اللي بيحتوي على أحماض كيميائية مقشرة.
ومعظم ماسكات الكريم اللي وظيفتها ترطيب البشرة أو توحيد ملمسها ممكن برضه تستخدم كعلاج للبشرة، وسهل تتساب على البشرة فترات طويلة من غير القلق من أي آثار عكسية.
6- ماسكات النوم SLEEPING MASKS
أو الماسكات الليلية Overnight Masks، هي ماسكات كريمية ليها فاعلية أعلى في الترطيب، بتحتوي على مواد مغذية ومرطبة زي زبدة الشيا وحمض الهيالورونيك وغيرهم، واللي بيقدروا يشتغلوا على البشرة طول فترة الليل وأثناء النوم.
طيب إيه الفرق بين كريمات الليل والماسكات الليلية؟
الفرق بيكون في حاجتين:
- تركيز المواد الفعالة جوة قاعدة الكريم نفسها.
- قوام الماسك بيكون أتقل وأغنى، عشان يضمن امتصاص كامل للمكونات.
ومن أمثلة الماسكات الليلية كريم ماسك الليل هيالورون إكسبيرت من لوريال باريس
وكريم ماسك الليل ريفيتاليفت ليزر إكس3 من لوريال باريس
L’Oreal Paris Hyaluron Expert Night Cream Mask – كريم ماسك الليل هيالورون إكسبيرت من لوريال باريس
L’Oreal Paris Revitalift Laser X3 Night Cream Mask – كريم ماسك الليل ريفيتاليفت ليزر إكس3 من لوريال باريس
7- ماسكات الجل GEL MASKS
8- ماسكات الفقاعات BUBBLE MASK
ه ماسك جل بيتفاعل مع الهوا لما يتفرد على البشرة وبيتحول لرغوة فقاعية، بهدف تعزيز الدورة الدموية وتنشيط البشرة عن طريق زيادة الأكسجين على سطحها، وكمان لتنضيف البشرة بعمق أكبر عن الطريق الرغوة اللي بتتكون واللي بتزيل الأوساخ والشوائب من البشرة.
لكن في الحقيقة، على الرغم من إن النوع ده من الماسكات ممتع في استخدامه وأصبح تريند، إلا إن فوايده للبشرة مش مثبتة لحد دلوقتي، بالعكس كمان، المكونات اللي بتكوّن الرغوة ممكن تسبب تهيّج الجلد.
9- ماسكات التسخين WARMING MASKS
دي ماسكات بتحتوي على توابل حارة زي القرفة أو الفلفل الحلو، بتسخن البشرة وتسبب إحساس بالشكشكة، وفيه منها اللي بيحول الجلد لللون الوردي بسبب زيادة تدفق الدم، التأثيرات دي بتستمر 20-60 دقيقة لبشرة منورة وصحية.
لكن الماسكات دي مش مناسبة لكل أنواع البشرة، ولو بشرتك حساسة فالأحسن تختاري من ماسكات الكريم أو الجل عشان تتجنبي أي التهابات ممكن تحصل لبشرتك.
10- ماسكات الجسم BODY MASKS
أصبح فيه دلوقتي انتشار واسع لأنواع تانية من الماسكات غير ماسكات الوجه، زي ماسكات اليدين Hand Masks، وماسكات الشفايف Lip Masks، وغيرهم، والماسكات دي بتكون غالباً إما ماسكات تقشير بمواد زي حمض الساليسيلك، أو ماسكات ترطيب بمواد زي البانثينول أو زبدة الشيا.
11- الماسكات الطبيعية
دي الماسكات المنزلية اللي تقدري تعمليها في البيت باستخدام المكونات الطبيعية، وبتكون أسهل طريقة للاستفادة من فوايد المكونات الموجودة حواليكي بأقل تكلفة، فعندك مثلاً:
العسل
لتنضيف البشرة بعمق، وترطيبها وتنعيمها.
الأفوكادو
بيحسن ملمس البشرة، وبيكون أساس كريمي لباقي المكونات.
الليمون
لتفتيح البقع الغامقة وتوحيد لون البشرة.
الزبادي
بيقلل آثار الشيخوخة، وبيقلل ظهور المسام.
الماتشا
بيساعد على تقليل إنتاج الدهون الزيادة، ومضاد للالتهابات والميكروبات.
دقيق الشوفان
ملطف ومضاد للالتهابات، فبيهدي التهيج والاحمرار.
بس خدي بالك، مش كل المواد الطبيعية تكون بالضرورة آمنة على بشرتك، وزي ما فيه مواد طبيعية مفيدة للبشرة، فيه برضه مواد طبيعية لازم تاخدي بالك من احتياطات معينة وانتي بتتعاملي معاها، عشان تتجنبي أي نتايج عكسية، زي مثلاً:
المواد الحمضية
زي الليمون وأنواع مختلفة من الخل، لازم استخدامهم يكون بكميات قليلة جداً ومحسوبة، لأن الزيادة في كمياتهم ممكن تسبب تهيجات والتهابات ممكن توصل لبعض الحروق.
بياض البيض
بيكون بيئة مناسبة لتكاثر البكتريا، وبالتالي مش من المواد المفضلة في عمل الماسكات لأنه ممكن يسبب عدوى لبشرتك، خاصةً لو فيه في بشرتك جرح مفتوح.
البيكنج صودا
بتكون قاسية على البشرة بسبب قلويتها الشديدة.
ومن الماسكات الطبيعية المفيدة لبشرتك:
وقت التحضير
5 دقائق
هدفه
ترطيب البشرة
ماسك الجيلاتين، هل فعلا بيفتح البشرة وبيشيل الرؤوس السودا؟
وقت التحضير
5 دقائق
هدفه
تقشير الجلد الميت
تقشير الوجه بالقهوة، مفيد لبشرتك ولا لأ؟ وإيه رأي المتخصصين؟
وقت التحضير
5 دقائق
هدفه
تقشير الجلد الميت
ماسك القهوة والنشا لترطيب وتفتيح البشرة والتخلص من الجلد الميت
اختيار الماسك المناسب:
محاولة اختيار ماسك مناسب لبشرك ممكن تكون محيرة بالنسبالك، عشان هتلاقي المئات من التركيبات، ودايماً هتسألي نفسك: أختار إيه؟
والإجابة بسيطة جداً:
عشان كده ضروري يكون عندك فكرة كويسة عن المواد اللي محتاجاها تكون موجودة في الماسك اللي اختارتيه عشان يحل مشكلة معينة في بشرتك، فمثلاً لو مشكلتك هي:
حب الشباب
هتكوني محتاجة ماسك بيحتوي على حمض الساليسيليك وأحماض الألفا هيدروكسي.
الخطوط الخفيفة والتجاعيد
دوري في المكونات على مضادات الأكسدة زي فيتامين سي وفيتامين هـ والريسفيراترول، حمض الفيروليك أو الريتينويدات وأشهرهم الريتينول، المرطبات زي حمض الهيالورونيك.
حمرار البشرة أو المسام الواسعة أو زيادة إفراز الدهون
النياسيناميد هنا هيكون كلمة السر.
البقع الغامقة والتصبغات
هتحتاجي حمض الكوجيك والريتينويد وفيتامين سي.
طرق استخدام ماسكات البشرة:
كل نوع ماسكات ليه طريقته في التطبيق والإزالة، وهنتكلم عن ده بالتفصيل واحنا بنستعرض سوا الخطوات الأساسية لاستخدام الماسكات، من أول تجهيز بشرتك قبلها، لحد الخطوات التكميلية بعدها:
- ابدأي بتجهيز كل حاجة هتحتاجيها قبل ما توزعي الماسك على بشرتك.
- من الأفضل يكون معاكي فرشة عريضة وصغيرة وناعمة لتوزيع الماسك عشان تضمني توزيعه بالتساوي، وعشان تقللي من الفوضى اللي ممكن تسببها بعض الماسكات، والأهم عشان التوزيع بالفرشة بيكون صحي أكتر لبشرة سليمة، اتأكدي من نضافة الفرشة قبل ما تبدأي، ونضيفها مباشرةً بعد ما تخلصي.
- لو مش معاكي فرشة وهتوزعي الماسك بصوابعك، فلازم تتأكدي من نضافة إيديكي وضوافرك قبل ما تبدأي في توزيعه.
- لو الماسك بتاعك وصفة منزلية، جهزي كمية على أد استخدام مرة واحدة، واحتفظي بيها في التلاجة لحد ما تحضري باقي الأدوات.
- لو الماسك جاهز زي ماسكات الجل أو الماسكات الورقية، ممكن تبرديه في التلاجة لمدة 15 دقيقة، ده بيلطف البشرة وبيديها إحساس منعش.
- استخدمي غسولك العادي لتنضيف بشرتك من المكياج والدهون والأوساخ الموجودة على سطحها، ده بيساعد مكونات الماسك على اختراق الجلد بشكل أفضل.
- ممكن تزوّدي من امتصاص بشرتك للمواد الفعالة في الماسك عن طريق استخدام فوطة قطن تم غمسها في مياه سخنة، وتغطي بيها بشرتك لحد ما تبرد، ده هيساعد على فتح المسام، ويزوّد من فاعلية الماسك بسبب زيادة امتصاص مكوناته.
- ماسكات الطين والفحم: وزعي طبقة رقيقة ومتساوية من الماسك على بشرتك من تحت لفوق، باستخدام الفرشة أو ضهر معلقة صغيرة، أو بأطراف صوابعكم وزعيها بنفس طريقة ماسكات الكريم والجل، وممكن تحتاجي تنعمي الماسك على بشرتك بأطراف صوابعك، خاصة مع ماسكات التقشير بتكنيك ال Exfoliation.
- الماسكات الورقية: الماسكات الورقية ممكن تكون قطعة واحدة أو قطعتين، قطعة لمنطقة الجبهة والأنف ومحيط العين والخدود، وقطعة لمحيط الشفايف والدقن، وهي من أسهل الماسكات في الاستخدام، كل المطلوب منك إنك تخرجي الماسك من غلافه الواقي، وتحطيه على بشرتك، وتضغطي بالراحة عشان يثبت عليها بشكل متساوي.
- طبقي الماسك بتاعك قدام المراية، عشان تضمني توزيع متماثل وإنك ماسيبتيش مكان ماجاش عليه الماسك، وماتنسيش رقبتك وانتي بتوزعي الماسك اعتبريها دايماً امتداد لبشرة وجهك، لأنك مش هتكوني مبسوطة أبداً ببشرة وجه منورة ومشدودة مع رقبة باهتة ومترهلة.
- بشكل مبدئي، ماسكات البشرة مش من المفروض إنها تتوزع على محيط العين والشفايف، عشان كده قبل ما توزعي الماسك بتاعك استخدمي كريم أو جل العين بتاعك لحماية محيط العين من التعرض للماسك، كمان استخدمي الليب بالم أو فازلين الشفايف لنفس السبب.
- طرق تطبيق أنواع الماسكات المختلفة:
- ماسكات الكريم والجل والفقاعات والماسكات الطبيعية: وزعي طبقة رقيقة ومتساوية من الماسك على بشرتك من تحت لفوق، باستخدام الفرشة أو بأطراف صوابعك.
- ماسكات التقشير: وزعيها بنفس طريقة ماسكات الكريم والجل، وممكن تحتاجي تنعمي الماسك على بشرتك بأطراف صوابعك، خاصة مع ماسكات التقشير بتكنيك ال Exfoliation.
- ماسك النوم: وزعيها على بشرتك بنفس طريقة توزيعك للكريم المرطب.
- بتختلف المدة اللي هتسيبي فيها الماسك على بشرتك باختلاف الماسك نفسه، في العادة بتتراوح المدة دي من 10-30 دقيقة مش أكتر، ودايماً التزمي بالمدة اللي متحددة في التعليمات على عبوة الماسك.
- بشكل عام، ماسكات تجفيف البشرة الدهنية بتكون مدتها قصيرة، وماسكات الترطيب ومعالجة علامات الشيخوخة بتكون مدتها أطول ممكن توصل ل 8 ساعات زي في حالة الماسكات الليلية (ماسكات النوم).
- بشكل عام استخدمي المياه الفاترة أو الدافية لتنضيف بشرتك من الماسكات، وماتستخدميش أبداً المياه السخنة، كمان اتعاملي مع بشرتك بمنتهى الرقة وانتي بتتخلصي من بقايا الماسك وبلاش الفرك القوي، كذلك وانتي بتنشفيها بعد الغسيل نشفيها بفوطة ناعمة وحركات طبطبة خفيفة.
- طرق تنضيف أنواع الماسكات المختلفة:
- الماسكات الورقية: مش بتحتاجي معاها لغسيل بشرتك، كل اللي عليكي إنك تشيليها بالراحة وتدلكي اللي باقي من السيروم بتاعها على بشرتك ورقبتك.
- ماسكات التقشير بتكنيك ال Peel-off: بنفس الطريقة، شديها بالراحة جداً من الأطراف من فوق لتحت، وخدي وقتك ماتسحبيهوش بقوة، وغالباً مش بتحتاجي لشطف بشرتك بعدها.
- ماسكات التقشير بتكنيك ال Exfoliation: بللي بشرتك بالمياه الفاترة، ودلكي البشرة بلطف بحركات دائرية لفوق، وبعدين اشطفيها كويس بالمياه.
- ماسكات الطين: بللي قطعة قماش بالمياه الفاترة وثبتيها على بشرتك لمدة ثواني، وممكن تكرري الخطوة دي عشان تفككي الماسك اللي تصلب على بشرتك، ده هيخلي تنضيف الماسك وشطفه أسهل وألطف كتير على بشرتك، بعد كده ابدأي بتدليك كل منطقة بحركات دائرية لفوق.
- ماسكات الفحم: امسحيها من على بشرتك بقطعة قماش مبللة بالمياه الدافية.
- ماسكات الكريم: امسحيها بالراحة بمنديل، ولو النوع اللي بتستخدميه محتاج شطف، استخدمي فوطة مبللة بمياه فاترة لشطفه وتنضيف بشرتك من أي بقايا زيادة.
- ماسكات الجل: انقعي قطعة قماش في مياه فاترة ولفيها على بشرتك، بعد كده امسحي الماسك بقطعة القماش بالراحة، وبعدين اشطفي بشرتك بالمياه عشان تتأكدي إنك اتخلصتي من كل البقايا.
- ماسك الفقاعات: بمنتهى البساطة، امسحي الماسك بفوطة قطنية مبللة بمياه فاترة، أو اشطفيه بالمياه الفاترة بشكل مباشر، ونشفي بشرتك.
- الماسكات الليلية: مش بتحتاج لغسيل، بتمتصها بشرك وانتي نايمة، وبتصحي تعملي روتينك اليومي زي ما متعودة.
رشي المياه الباردة على بشرتك بعد إزالة الماسك عشان تقفلي المسام، وبعدين استخدمي كريم أو سيروم مرطب وبشرتك لسة رطبة، وزعي منه طبقة رقيقة عشان يحافظ عليها مترطبة، ويزوّد من تأثيرات الماسك، ده لأن المرطب بيكون حاجز فيزيائي على الجلد، بيمنع فقدان المياه، ويحبس المواد الفعالة جوة البشرة، فيحافظ على تأثيرها لفترة أطول.
نصايح عامة لاستخدام الماسكات:
1- بلاش مبالغة في استخدام الماسكات:
لو تعرفي حد بيستخدم الماسك بتاعه مثلاً كل يوم، ده مش معناه أبداً إن ده هيكون مناسب معاكي، بالذات لو بنتكلم على ماسكات زي ماسكات التقشير أو لو بشرتك حساسة.
فنصيحتنا ليكي ابدأي ببطء وزودي بالتدريج، لحد ما توصلي لمعدل الاستخدام المناسب ليكي، وغالباً مرة أو مرتين في الأسبوع بيكون معدل نموذجي جداً.
2- فكري في طريقة الماسكات المتعددة:
لو حاسة مثلاً بترهل أو تشققات في خدودك وفي نفس الوقت بتعاني من الدهون الزيادة في منطقة ال T-zone، ده معناه إن بشرتك مختلطة زي معظمنا، هنا طريقة الماسكات المتعددة هتكون مناسبة جداً ليكي، جربي توزعي ماسك لشد البشرة أو ماسك مرطب على منطقة الخدود، وفي نفس الوقت ماسك فحم أو طين على منطقة ال T-zone، صحيح ممكن الطريقة دي تستهلك وقت أكتر شوية، لكنها منطقية ومفيدة، فلو عندك وقت جربيها.
3- اقري تعليمات الاستخدام الموجودة على العبوة:
معدل تكرار استخدام الماسك بيعتمد على تركيبة الماسك نفسه وعلى نوع بشرتك، فمثلاً:
- لو بشرتك حساسة التزمي باستخدام الماسك اللي يناسبها بمعدل مرة واحدة بس في الأسبوع.
- ماسكات التقشير كمان مش بيفضل تكرارها أكتر من مرة في الأسبوع أو مرة كل أسبوعين على حسب طريقة الماسك في التقشير.
- ماسكات الطين أو ماسكات الترطيب ممكن تستخدميها بأمان مرتين أو حتى 3 مرات في الأسبوع.
وعشان ماتحيريش نفسك، اطمني إن أفضل طريقة للتعامل مع ماسك معين هي اتباع التعليمات الموجودة على عبوته.
4- لتحقيق أقصى استفادة من مكونات الماسك
بعد ما استقريتي على خامة الماسك اللي تريحك، وعرفتي المواد اللي محتاجاها بشرتك، وعرفتي كمان معدل تكرار الاستخدام، أكيد دلوقتي عاوزة بشرتك تستفيد تماماً من الماسك اللي اخترتيه، وعشان تحققي ده فيه خطوات بسيطة محتاجة تعمليها:
نضفي بشرتك قبل الماسك ورطبيها بعديه
شرتك لازم تكون نضيفة المكياج والشوائب والدهون الزيادة، عشان كده استخدمي غسولك العادي قبل الماسك عشان تضمني امتصاص مكوناته بشكل سليم.
كمان الترطيب خطوة ضرورية بعد الماسك، خاصةً ماسكات التقشير وامتصاص الدهون والتنضيف العميق، أما ماسكات النوم فهي الوحيدة اللي مش محتاجة ترطيب بعدها.
استخدمي الماسك بانتظام
استخدام الماسك مرة واحدة مش هيفيدك كتير، لكن الاستخدام المنتظم هو اللي هيخليكي تلاحظي تأثيره وتوصلي للنتيجة اللي اختارتيه عشانها، عشان كده استخدمي نفس الماسك لمدة مش أقل من 6-8 أسابيع قبل ما تاخدي قرار بتغييره، ولو عندك أكتر من مشكلة في بشرتك، تقدري تطبقي طريقة الماسكات المتعددة اللي اتكلمنا عنها عشان تكسبي وقت.
ماتسيبيش الماسك فترة طويلة على بشرتك
لاش فكرة “كل ما اسيب الماسك أكتر كل ما يديني نتيجة أقوى”، الفكرة دي غلط تماماً، وعشان نقربلك الفكرة، تخيلي ماسك تقشير المفروض يتحط على بشرتك لمدة 10 دقايق، إيه ممكن يحصل لبشرتك لو سيبتيه لمدة ساعة؟، فضروري جداً تلتزمي بالتعليمات الموجودة على الماسك.
لو محتاجة تفاصيل أكتر عن الأضرار اللي ممكن تحصل لبشرتك لو عملتي كده، تقدري تعرفيها من المقال ده.
افتكري إن مش دايماً الأغلى يكون بالضرورة الأفضل
ممكن يكون فيه ماسكات كتير من براندات مشهورة وغالية لكن مش متوافقة مع نوع ومشاكل بشرتك، وممكن ماسك منزلي بسيط تعمليه بنفسك في البيت يديكي نتايج هايلة، الموضوع كله بيرجع للمادة الفعالة، عشان كده دوري على أفضل تركيبة في حدود ميزانيتك، وماتخليش هدفك إنك تدوري على التريند.
االمصادر
ضيفي أول ريڤيو عن “في 6 خطوات بس، إزاي تطبقي الماسكات على بشرتك صح”