الطلبات
تساقط الشعر الكيرلي وعلاجه
كل بنت بتهتم بشعرها بيفرق معاها إنه يكون في أحسن حالاته وبتزيد ثقتها في نفسها لما يكون شكله صحي ومش تالف أو بيتساقط، والشعر الكيرلي بالأخص له جماله المتميز بحلقاته الملفوفة حوالين نفسها ورغم وجود بنات كتير نوع شعرها كيرلي إلا ان التساقط مشكلة بتواجه كل واحدة مهما كانت خُصلات الكيرلي مختلفة تمامًا بشكل حلقاتها المرنة اللي بتتناسق مع شكلها.. علشان كده مفيش تصنيف بين أنواع الشعر ان كان “ناعم” أو “خشن” لكن حسب شكله الطبيعي، هنساعدك في المقال ده انك تهتمي بيه أكتر و تحافظي عليه من التساقط اللي يعتبر من أكبر مشاكل الشعر الكيرلي
ايه هو الشعر الكيرلي؟
هو نوع شعر خيوطه بتكون ملفوفة حوالين نفسها في شكل حلزونات، بيتميز خيط الشعر الكيرلي إنه حلزوني من البداية (الجذور) للأطراف، لأن الشعر الكيرلي بيتموج بطبيعته وصعب يتفرد حتى بأدوات فرد الشعر ودايمًا بيحتاج حرارة عالية علشان يوصل للشكل المفرود تمامً، وللأسف في بنات بتحس ان الشعر الكيرلي مش جميل زي الشعر المفرود، وده غلط لأن مقياس جمال الشعر بيتحدد حسب فهمك لنوع الشعر واهتمامك بيه.
أنواع الشعر الكيرلي
أنواع الشعر مش بتتحدد حسب نعومة الشعر، لكن حسب خيط الشعراية والشكل الطبيعي ليها من غير أي تغييرات خارجية، وكمان الشعر الصحي والشعر التالف بيفرق في تحديد نوع الشعر، وده هيساعد في اختيارك لطريقة العناية بشكل شعرك الطبيعي وتعرفي تبيّني جماله ازاي لما تهتمي بيه.
النوع المستقيم 1 .. النوع المموج 2 ويفي .. النوع الملتف بحلقات واسعة 3 .. النو الملتف بحلقات متوسطة 4 .. النوع الحلزوني المتوسط 5 .. النوع المجعد الحلزوني الضيق 6 . اختلاف الأنواع بيعتمد على الموجة وشكل الخصلة وهي ملفوفة على نفسها، ومفيش نوع أحسن من التاني لأن لكل نوع جماله اللي يميزه.
إيه الفرق بين التساقط الطبيعي و المرضي؟
في تساقط بيحصل طبيعي مش بيحتاج علاج طبي، وبيكون في نسبة لتساقط الشعر الطبيعي محتاجة تميزي بينها وبين التساقط المرضي اللي هتحتاجي تكشفي علشان تعالجيه، بيكون متوسط التساقط الطبيعي من 75 إلى 150 شعرة في اليوم الواحد، لأن دورة حياة الشعراية قصيرة، والتساقط اليومي يعتبر تساقط طبيعي لأن البصيلة حية بتنتج شعراية جديدة في كل مرة تفقد فيها شعرة قديمة انتهت دورتها، ولو حصل تغيير في الدورة الطبيعية للشعرة هيكون نوع التساقط مرضي وبقيتي محتاجة تتابعي مع دكتور أمراض جلدية.
والتساقط المرضي فيه منه أنواع مختلفة ضروري تميزي بينهم علشان لما تكتشفي سبب التساقط هتعرفي العلاج المناسب و توصلي لنتيجة في وقت قليل لأن العلاج مش ثابت، بيتغير حسب نوع تساقط الشعر اللي موجود عندك.
يعني ايه تساقط الشعر؟
كل بصيلة بتنتج شعر في الفروة بتكون حية، ومع ظهور سبب عرضي (يعني حاجة حصلت فجأة أثرت على البصيلة) بقى بيمنع البصيلة انها تنتج شعراية جديدة بدل اللي حصلها تساقط فبيكون في مشكلة محتاجة علاج والمشكلة دي اسمها “تساقط الشعر”.
بتحصل لكل الناس كبار أو صغار ومنتشرة بين البنات أكتر، وفي المقال ده هنتكلم عن مشاكل تساقط الشعر الكيرلي وإيه أسبابه وازاي تعالجي التساقط حسب نوعه.
بعد ما عرفتي الفرق بين تساقط الشعر الطبيعي وتساقط الشعر اللي محتاج يتعالج، ممكن تكوني فكرتي في سؤال مهم زي “هل تساقط الشعر حاجة مُعدية؟” أو “هل علاج تساقط الشعر هيرجعلي شعري اللي وقع؟”
الإجابة هي إن تساقط الشعر مش مُعدي لأنه بيحصل بسبب مشاكل صحية داخلية مرتبطة بكل بنت لوحدها وبيختلف نوع التساقط وبيختلف العلاج حسب تفاصيل كل حالة، وبالتالي العلاج هيكون هدفه تحفيز بصيلات الشعر علشان ترجع تنتج شعر تاني جديد بديل للشعر اللي تساقط، أو ممكن العلاج يكون هدفه انه يساعد في توقف سقوط الشعر الموجود في الفروة.
علامات تساقط الشعر الكيرلي
من العلامات الظاهرة :
- وجود شعر على ا المخدة اللي بتنامي عليها.
- كثافة الشعر بتقل بالتدريج.
- تسريحة ديل الحصان بتظهر بشكل رفيع.
- استمرار التساقط لفترة طويلة (بالشهور).
- سحب الشعر لورا وخصوصًا من الجوانب.
- لما تقسمي شعرك بيظهر مساحة واسعة فاضية في الفروة.
- نزول الشعرة بطولها من الجذور لما تمرري إيديكي بين خُصلات شعرك.
- تساقط الشعر وقت الاستحمام (الشعرة مبلولة) يكون أكتر من اللي متعوده عليه.
تساقط الشعر ممكن يكون من أعراض وجود مشاكل صحية، وعلامات التساقط مش كلها بتكون واضحة و ظاهرية على الشعر والفروة لأن في علامات ومؤشرات صحية بتعرفيها بعد الكشف مع دكتور أمراض جلدية
أسباب تساقط الشعر الكيرلي
تغيرات الحالة النفسية
الحالة النفسية عند البنات بتأثر بشكل كبير وملحوظ على الشعر مهما كان نوعه، و بتأثر على الشعر الكيرلي بشكل واضح أكتر لأن كثافته بتتأثر وبيظهر في الشكل الخارجي لما بتقل كثافته وبيكون متساقط حواليكي في كل مكان بتكوني موجوده فيه، وبالتالي هتزعلي أكتر و يفضل التساقط مستمر.
استخدام م مُبالغ لأدوات فرد الشعر الحرارية
الشعر الكيرلي بيكون في شكل خُصل ملفوفة بطبيعته، ولما تستخدمي الحرارة بشكل متكرر بيحصل انكسار للخصلة و تتساقط لأن الشعر الكيرلي بيحتاج درجة حرارة عالية أكتر من أي نوع شعر تاني علشان شكله الطبيعي يتغير لحالة الفرد، وبالتالي الشعر بيفقد شكله الطبيعي مع استمرارية استخدام الحرارة العالية.
تمشيط الشعر مبلول
بعد ما بتغسلي شعرك بيكون في أضعف حالاته وتقيل من المياه لأنها بتشده للأرض (اتجاه الجاذبية) وبيبقى سهل يتساقط من أي شد بسيط، وكمان التمشيط هيكون صعب في الحالة دي لأن الشعر هيكون متشابك والشد هيسبب ألم في فروة الراس وتكسير للشعراية ويتساقط الشعر من جذوره.
تسريحات شعر مشدودة
في أشكال تسريحات كتيرة بتكون جميلة وبتحتاج الشعر يتشد علشان ترفعيه أو تسحبيه من عند الجبه، لكن الاستمرار على نفس التسريحة لساعات أو على فترات متكررة بيكون مرهق على الشعر والبُصيلة، بالتالي بيحصل تكسير وتساقط للشعر.
استخدام منتجات غير مناسبة
منتجات الشعر الكيرلي موجوده كتير جدا في الصيدليات وبتختلف حسب نوع الفروة ان كانت دهنية أو جافة أو عادية، والمسامية ان كانت عالية أو متوسطة أو قليلة، فكده تصنيفات المنتجات موجودة علشان تساعدك تختاري المنتجات اللي تحافظ على شكل الخُصل الحلزونية الجميلة بتاعتك.
التقدم في السن
بيزيد سقوط الشعر مع التقدم في السن من أول مرحلة البلوغ والمراهقة وبتبدأ بصيلات الشعر تتأثر والشعر بيبقى خفيف بالتدريج، وبيزيد الفرق مع كل بداية عقد زمني جديد يعني مع أول العشرينات والتلاتينات وبيبدأ الشعر يقل ويفقد لونه بالتدريج، وده شيء طبيعي بيحصل لكل البنات.
أنواع تساقط الشعر الكيرلي
تساقط الشعر التفاعلي
بيحصل تساقط الشعر التفاعلي نتيجة سبب خارجي حصل معاكي وشعرك اتأثر وتساقط من جذوره، زي:
- تغيرات كبيرة في كمية الأكل بشكل مفاجئ، يعني تخسي بسرعة في وقت قليل أو زيادة الوزن بشكل كبير في وقت قليل.
- عدوى من أي مرض شديد، زي أرتفاع درجة الحرارة أو الكورونا أو الجيوب الأنفية.
- استخدام زيوت تقيلة، يعني لما بتستخدمي الزيوت الخام على فروة الشعر بشكل مباشر.
- استخدام أدوية يومية، وده في حالة انك بتواظبي على عدد أدوية كبير في اليوم الواحد.
- التعرض للشمس، يعني بتكوني موجوده في الشمس لفترة طويلة وبشكل مباشر.
- حالة مرضية شديدة، زي الاكتئاب والحمل والولادة.
التدخين، يعني لما بتدخلي نيكوتين لجسمك.
تساقط الشعر الوراثي
كل بصيلة بيخرج منها شعريتين، وفي التساقط الوراثي بتبدأ الشعراية انها تكون رفيعة من أول الجذور وبتتساقط وممكن الشعراية التانية كمان تتساقط.
ومن هنا هتبدأي تحسي ان:
- كثافة شعرك بتقل.
- فيه تساقط طبيعي بيحصل مع تساقط الشعر الوراثي فبيكون سهل نميز بينهم بالمنظار لما تكشفي مع دكتور أمراض جلدية متخصص.
- الشعور بألم في فروة الرأس.
المؤشرات دي ممكن تظهر بعد أي سن من بعد سن البلوغ، وبيزيد مع الوقت والتقدم في السن.
تساقط الشعر الهرموني
بيحصل تساقط الشعر الهرموني لو الهرمونات حصلها اضطرابات أو تغيرات بالتالي الشعر بيتأثر ويتساقط، وبيكون التساقط هو طريقة بيقول بيها الجسم ان في مشكلة صحية محتاجة تتعالج، ومن المشاكل الصحية اللي بتسبب تساقط الشعر:
- هرمون الغدة الدرقية، لو حصل زيادة أو نقص في إفراز هرمون الغدة بيسببوا تساقط الشعر.
- تكيسات المبايض، وجود التكيسات بتسبب اضطرابات في الهرمونات وبالتالي بيحصل تساقط للشعر.
- الغدة النخامية، غدة موجودة في المخ وبتفرز هرمون اللبن اللي لو زاد بيغير الكثافة الطبيعية لشعر الجسم ويتساقط شعر الفروة.
تساقط الشعر المناعي
بيحصل تساقط الشعر المناعي نتيجة خلل في الجهاز المناعي أو اضطرابات في وظايفه فبيهاجم بصيلات الشعر، وبيكون التساقط بداية ظهور أمراض خطيرة زي:
- “الثعلبة” منتشرة وبتسبب تساقط لجزء دائري في أي مكان في الفروة وممكن كمان شعر الحواجب والرموش.
- “الحزاز” بيحصل بأي شكل في الفروة وبيكون مصاحب لوجود فيروس سي.
- “الذئبة الحمراء” من الأمراض اللي بتصيب جهاز المناعة ومن أعراضه تساقط الشعر وفي أعراض تانية بيعرفها الدكتور وقت التشخيص.
تساقط الشعر الدوائي
بيحصل تساقط الشعر الدوائي بسبب أدوية ممكن تكون آثارها الجانبية انها تسببلك تساقط أو أدوية هدفها علاج التساقط وبيحصل نتيجة عكسية وبيزيد التساقط بعد استخدامها، لأن في أدوية كتير جدا بتسبب تساقط الشعر، علشان كده بننصحك تختاري الدواء حسب درجة الاستفادة منه ومع متابعة الدكتور هيختار ليكي بدايل أقل ضرر، ولو في أدوية مؤقتة مش هتستخدميها دايمًا ومفيش بدايل ليها هتكون الأولوية للأدوية ومع متابعة الدكتور هتوصلي لأقل ضرر ممكن.
تساقط الشعر الفيزيائي
بيحصل تساقط الشعر نتيجة سبب فيزيائي يعني لو حصل شد للشعر أو ضغط أو احتكاك، ممكن يحصل تساقط للشعر لو بتشدي شعرك وانتي بتسرحيه أو بترفعية بشكل مشدود بقوة بالتالي خصلة الشعر هتكون ضعيفة وسهل تتكسر وتتساقط، وممكن يحصل ضغط على الشعر نتيجة عاداتك اليومية زي انك بتسندي بإيدك اليمين على راسك تجاه اليمين هتلاقي الجزء ده مسحوب لورا (منحول) أو من الاتجاه التاني لو متعوده تسندي من الشمال، وكمان شكل الضفاير و الراستا حلو لكن تكرارها بيعمل ضغط عالي على بصيلة الشعر وبيسحب الشعر ويسبب تساقط.
تساقط الشعر المُعدي
بيحصل تساقط الشعر نتيجة عدوى أو إصابة بأي مرض بطريقة مباشرة لو حصل إصابة بالبكتيريا أو الفطريات، لو مناعة الجسم ضعيفة هيزيد تساقط الشعر لأن وجود البكتيريا والأدوية اللي بتهاجمها هيأثروا على بصيلات الشعر، ولو المحيط اللي حواليكي مناسب لانتشار الفطريات ممكن تسبب انسداد لقنوات الشعر، من الفطريات المشهورة هي القشرة ومن الأفكار الغلط المنتشرة ان القشرة مُعدية لكن هي بتحصل من فِطر موجود على جسم كل الناس فبيستغل البيئة المحيطة بالشخص و بيتحول لشكل القشرة اللي نعرفها.
تساقط الشعر التجميلي
بيحصل تساقط الشعر نتيجة استخدام أدوات أو منتجات تجميلية على الشعر وعلى الفروة وبتكون المنتجات تقيلة أو غير مناسبة ليكي فبتسبب تساقط أو أدوات فرد الشعر والحرارة العالية أو الصبغات اللي بتحتاج تسحب لون الشعر وبعدها صبغ الشعر بلون جديد، العادات دي ممكن تكسر الشعر و تقصفه لو مستمرة على الحرارة أو الصبغات وبالتالي هيحصل التساقط وبكثافة كبيرة.
ومن المنتجات اللي بتأثر هي روتين فرد الشعر اللي موجود في صالونات التجميل زي الكيراتين والبروتين ممكن يسببوا تساقط.
العادات المغلوطة المنتشرة وبتسبب تساقط الشعر
ممكن توصلي للكثافة اللي نفسك فيها من غير أي منتجات تقيلة أو أدوات حرارية لو اختارتي روتين مناسب لنوع الكيرلي بتاعك و واظبي عليه بانتظام كل أسبوع.
علاج تساقط الشعر الكيرلي
علاج تساقط شعر كل بنت هيكون مختلف عن التانية لأنها بتفرق حسب تفاصيل وظروف كل بنت، لكن الجزء الايجابي ان في عادات وخطوات بسيطة ممكن تعمليها في يومك هتساعدك في علاج سقوط الشعر، والجزء التاني ان أي علاج هيحدده ليكي دكتور الأمراض الجلدية هتحتاجي تستمري عليه حتى بعد ظهور نتايج لأنك لو وقفتي العلاج فجأة ممكن يحصل مشاكل لشعرك.
اغسلي فروة شعرك بالشامبو
عند غسل الشعر بالشامبو دلكي الفروة بلطف وسيبيه دقايق قليلة علشان الشامبو يعمل دوره وينضف الفروة من أي أتربة وفطريات، متنسيش ان الشامبو للفروة بس والشعر مش بيحتاج الشامبو.
استخدمي البلسم لشعرك
البلسم مهم جدا للشعر بعد الشامبو وقت غسل الشعر لأنه بيغذيه وبيحمي الشعر من التلف، علشان كده سيبيه دقايق معدودة قبل ما تغسلي شعرك ولما تغسلي شعرك دلكيه من غير ما تغسلي منه كل البلسم.
نشفي شعرك
الهواء المحيط بيكي بيكون فيه نسبة رطوبة عالية ممكن تأذي شعرك بعد غسله، علشان كده الأفضل انك تستخدمي حاجه قطن تنشفي فيها شعرك من غير اي احتكاك ممكن يشد الشعراية.
استخدمي مشط واسع
الشعر الكيرلي بيحتاج اهتمام خاص لأنه سهل يتساقط من اي احتكاك بسيط، علشان كده موجود أكتر من مشط تناسب الشكل الكيرلي، فـاستخدمي اللي يساعدك تفكي تشابك شعرك ويحافظ على الكيرلي.
مشطي شعرك
قبل ما شعرك يجف نهائي ابدأي مشطيه من الأطراف علشان فك التشابك يكون أسهل ومن غير شد لبصيلة الشعر، واستمري في فك التشابك من الأطرف للجذور وممكن تستخدمي منتج يساعدك في فك التشابك.
اختاري منتجات قليلة
المنتجات الكتيرة اللي بيتعرضلها الشعر الكيرلي ممكن تكون سبب ضرر أكتر من الفائدة لأن المواد الموجودة في كل منتج بتكون كتير وممكن كمان تكون تقيلة على الشعر الكيرلي،علشان كده بننصحك تختاري منتجات قليلة مناسبة ليكي.
اعملي تسريحات مريحة (مش مشدودة)
شد الشعر الكيرلي بيزود تساقط الشعر وبيسحب الشعر من الجوانب ويحصل فراغات، علشان كده بننصحك تبرزي جمال خصلاتك الحلزونية من غير تسريحة قوية أو مشدودة.
ابعدي عن وصلات الشعر (Hair Extensions)
شكل خصلات الشعر التركيبية أو وصلات الشعر بيكون جميل وبيضيف مظهر لطيف لكن استخدامها باستمرار أو لأوقات طويلة بيسبب ضغط على بصيلات الشعر الطبيعية وبتكون تقيلة.
قللي تلوين وفرد الشعر
كتير من البنات بتحب تغير شكل شعرها وتعمل ستايل جديد، لكن تكرار صبغ الشعر بالمواد القوية على الشعر بتسبب تقصف وتساقط للشعر، وكمان أدوات فرد الشعر الحرارية بيكون الإفراط فيها مضر.
قللي عدد مرات تمشيط شعرك
الشعر الكيرلي بيتميز بإنه بيحتفظ بشكله لوقت طويل لكن ممكن مع روتينك اليومي يهيش ويظهر شعر متطاير، ممكن تستخدمي كريم لترطيب الشعر و بإيديكي تظبطي كل خصلة من غير ما تستخدمي أي فرشة أو مشط.
المصادر
قوليلنا رأيك