الطلبات
هل شعرك الدهني سبب في تساقط الشعر؟
أسباب وعلاج تساقط الشعر الدهني وهل فروة الرأس الدهنية ليها علاج من غير ما يؤذي طبيعة الشعر؟
وازاي اختيارك لبعض منتجات العناية بالشعر هي اللي بتسببلك تساقط الشعر الدهني؟
لما بتلاقي شعرك بيتساقط بتبدأي لعبة التخمين، هل بسبب الشامبو الجديد؟ ولا ده نتيجة تسريحة الشعر ولا بيحصل بسبب الحمل ولا عشان الدايت.
مهم جداً تعرفي إيه اللي بيسبب تساقط الشعر عشان تعالجي السبب ده من البداية، احتمال تغيري الشامبو أو تعملي دايت مناسب، لكن الفكرة إن ممكن يكون كل الأسباب الخارجية دي مناسبة وفيه سبب داخلي هو اللي بيسبب تساقط الشعر الدهني بالتحديد.
يعني إيه شعر دهني؟
الغدد الدهنية بتفرز دهون في كل الجسم، وبالنسبة للشعر فهي بتفرز الدهون دي في فروة الرأس على شكل الزهم، وده عبارة عن مادة زيتية طبيعية بتنتجها فروة الراس على بصيلات الشعر بهدف إنها ترطب الشعر والجلد. لما بيحصل خلل في إنتاج الغدد دي للدهون وبتنتجها بشكل أقل بيبقى الشعر جاف، ولما بتنتج الدهون دي بشكل زيادة بيكون الشعر دهني.
هل الزهم ده حاجة ثابتة؟
الزهم مادة متغيرة ومختلفة باختلاف عوامل كتيرة منها اختلاف الجنس، تقدم العمر، تغير الهرمونات واختلاف النظام الغدائي.
هل فيه مشاكل من إن الشعر دهني؟
كل نوع شعر ليه مميزاته ومشاكله اللي لما بتتعاملي معاها صح بتقللي المشاكل دي ويبقى شعرك صحي وجميل.
الشعر الدهني من مميزاته إنه لامع وحيوي وسهل تسريحه لإنه ناعم بسبب إفراز الدهون والزيوت. من أكبر مشاكله هي بردو إفراز الدهون والزيوت لإنها لو كانت بشكل زايد وفي نفس الوقت محصلش اهتمام بالشعر بشكل مناسب، هتتسد مسام فروة الشعر وهتتراكم البكتيريا. وبالتالي هتحصل مشاكل في دورة نمو الشعر ممكن تؤدي لإن الشعر يبقى رقيق وبعدها بتسبب تساقط الشعر.
هل زيادة إفراز الدهون ممكن تسبب مشاكل تانية غير تساقط الشعر الدهني؟
زيادة الدهون في فروة الرأس ممكن تسبب الحكة وانتشار لقشرة الشعر وممكن تؤدي لالتهابات جلدية مختلفة بسبب تراكم البكتيريا والفطريات على الزيوت اللي بتفرزها فروة الرأس.
هل نوع خصلة الشعر بيأثر في طريقة عمل الدهون أو إن الشعر دهني أكتر؟
وع خصلة الشعر سواء ناعم ومستقيم أو مموج أو مجعد بالفعل بيأثر في طريقة عمل الدهون، فبتلاقي إن الشعر المستقيم والناعم دهني أكتر لأن في الشعر الناعم أو المستقيم بيتم توزيع الزهم بشكل سهل وسريع على الشعرة بشكل كامل.
أما الشعر المجعد والكيرلي بيكون دهني أكتر من ناحية الجذور لأن توزيع الزهم بيقابل تموجات في الشعر بتبطأ توزيعه على كل خصلات الشعر بسرعة. ولو كان شعرك كثيف ده معناه غدد دهنية أكتر وإفراز زهم بشكل أكبر والعكس صحيح.
لكن الشعر ممكن يبقى دهني لأسباب كتيرة غير نوع خصلة الشعر.
إيه أسباب إن الشعر دهني؟
فيه أسباب كتيرة لإن الشعر يبقى دهني منها الأسباب اللي هتقدري تعالجيها أو تتحكمي فيها ومنها الأسباب الثابتة للأبد لكن بالعناية المظبوطة هتقللي المشاكل والأضرار الناتجة عن وجودها. شوفي ازاي كل سبب من دول ممكن يسبب تساقط لشعرك وإيه منهم بيسبب ده لو اتعمل بشكل مش مناسب.
لو فروة الرأس ملتهبة ممكن تسبب زيادة إفراز الغدد الدهنية للزهم، وده بيسبب حاجات كتيرة منها ظهور البقع الفطرية والحكة أو الهرش وتراكم للجلد الميت على فروة الرأس. الحالة دي مش منتشرة لكن أعراضها كبيرة وبتختلف من شخص للتاني لكن لو ظهرت من الأفضل استشارة الدكتور بسرعة قبل ما تنتشر ومتعرفيش تسيطري عليها.
بمعنى إنه لو الأب أو الأم شعرهم دهني من الوارد يبقى شعرك دهني زيهم. مشكلة العامل ده إنه مينفعش تغييره أو التحكم فيه
الولاد والبنات بيفرزوا هرمون التستوستيرون لكن بيكون عند الذكور نسبته أكبر طبعاً. بيتم تحويل الديهدروتستوستيرون من هرمون التستوستيرون و ده بيحفز الغدد الموجودة في بصيلات الشعر إنها تزود إنتاج الزهم.
بتتغير مستويات الديهدروتستوستيرون بسبب حاجات كتيرة منها الإجهاد، الحمل، تقدم العمر والوصول لسن اليأس، الأدوية، نظام غذائي فيه دهون أو منتجات الألبان أو الأطعمة المصنعة بشكل كبير وممكن كمان يتغير بسبب بعض الحالات الطبية.
زيادة وجود الديهدروتستوستيرون بيأدي لتقلص بصيلات الشعر وبيصعب على الشعر الصحي إنه يفضل موجود. وده مع الوقت ممكن يؤدي لإن الشعر يبقى خفيف أو يوصل للصلع.
الشعر زي أي عضو موجود في الجسم بيستمد العناصر الغذائية اللي محتاجها وبتساعده ينمو بشكل صحي عن طريق الأكل اللي داخل للجسم، فبالتالي لو شعرك متغذي بشكل غير سليم هيأدي لمشاكل كبيرة، فعلى سبيل المثال لو بتاكلي وجبات فيها نسبة دهون عالية ده هيأثر على الغدد الدهنية اللي فروة شعرك وهيخلي شعرك يبقى دهني أكتر. بشكل عام لو الأكل مكانش فيه العناصر المهمة اللي بيحتاجها الشعر،ده هيخلي شعرك أضعف غير مشاكل كتيرة تانيه منها لتساقط الشعر. من هنا تقدري 22 أكلة فيها العناصر الغذائية اللي بيحتاجها الشعر في النمو وبتحميه من التساقط
النقطة دي قريبة من التغذية لأن اللي بيتدربوا كمال أجسام سواء بنات أو ولاد أحياناً كتير بياخدوا مكملات غذائية وبروتين و هرمونات تكبير العضلات، فزيادة البروتين اللي داخل للجسم أو لخبطة الهرمونات بيعمل مشاكل في الغدد الدهنية و بيسبب إنها تفرز الدهون بشكل أكبر من الطبيعي.
عدم الاهتمام بنظافة الشعر وخصوصاً فروة الرأس الدهنية بيسبب تراكم الدهون وخلايا الجلد الميت وبالتالي المسام بتتسد وبيضعف الشعر وبيقع، هييجي.
في بالك دلوقتي إن الحل في الغسيل الكتير عشان الدهون دي تتشال؟ الحقيقة إنه بردو لأ لإنك لما بتغسليه كتير بتحفزي الغدد الدهنية إنها تفرز دهون أكتر. فلو شعرك دهنيمن الأحسن ليكي تغسلي شعرك مرة كل يوم أو يومين.
إيه أسباب تساقط الشعر الدهني؟
كل الأسباب اللي اتكلمنا عنها فوق بتسبب إن الشعر يفرز دهون أكتر وبالتالي المسام هتتسد فيتساقط الشعر، فيه أكتر من سبب تاني لتساقط شعرك لو دهني.
منتجات غير مناسبة
اختيارك لمنتجات شعر خصوصاً الشامبو لو مش مناسب لطبيعة شعرك بيسبب مشاكل كتيرة منها التساقط.
لأن كل منتج منهم بيعالج أو بيزود حاجة معينة ممكن ميبقاش شعرك محتاجها فتأدي لعكس النتيجة اللي انت مستنياها.
منتجات العناية بالشعر
استخدامك لمنتجات عناية بالشعر زي الزيوت والكريمات بشكل كبير وزايد عن احتياج الشعر بيأدي لتراكم الكريمات والزيوت دي على فروة الشعر مع الزيوت اللي بيتم إفرازها بشكل طبيعي فبتأدي لانسداد المسام وتساقط الشعر.
التغيرات المناخية
أحياناً التغيرات المناخية والأتربة اللي بتكون في الجو بتسبب تراكم للأتربة والأوساخ على فروة الشعر وبعدها بتسبب ظهور القشرة وبعدها تساقط للشعر.
مع كل الأسباب اللي قولناها اللي منها طبيعي وصعب تغيريه ومنها اللي عادة أو روتين بتعمليه. هل مفيش حل للمشاكل دي أو ملهاش علاج؟
الإجابة إنه لأ وبالعكس. فيه حاجات بسيطة لو عملتيها هتتفادي معظم المشاكل الموجودة بسبب وجود الشعر الدهني.
ازاي أعالج الشعر الدهني واحميه من التساقط؟
ازاي تختاري شامبو مناسب للشعر الدهني؟
اختيار شامبو مناسب مش أسهل حاجة لإنه بيختلف باختلاف حاجات كتير منها وظيفته، هل للتنعيم؟ ترطيب الشعر؟ التغذية؟ علاج التقصف؟ علاج القشرة؟ لتساقط الشعر الدهني؟ ولا للتطويل؟ وغيرها من الوظايف. ده كله غير اختلاف طبيعة الشعر زي ما اتكلمنا، لإنك أكيد بتدوري على شامبو للشعر الدهني يكون بيعالج المشاكل الناتجة عن إفراز الزهم الزايد وميبقاش الشامبو نفسه سبب في إن انتاج الزييوت دي يزيد.
أهم 4 نصايح وانتي بتختاري شامبو للشعر الدهني
1- ابعدي عن الشامبو المرطب أو اللي هدفه تنعيم الشعر لأن طبيعة شعرك الدهني بيفرز زيوت ودهون مرطبة فشعرك مش محتاج ده بالعكس.
2- اتأكدي من العلبة إن الشامبو ده للتكثيف أو لتقوية الشعر
3- متستخدميش بشكل زايد ومتكرر شامبو فيه سلفات Sulfate، المادة دي بتنضف فروة الرأس أيوه لكن بشكل أزيد من اللازم فبتأدي للجفاف.
ممكن ييجي في بالك دلوقتي إنه بما إن شعرك دهني فمفيش مشكلة تستخدميه وهيجفف الشعر يعني هيقلل الدهون، الحقيقة إنه حتى لو ده مضر لأنه هيجفف الزيوت الطبيعية للشعر إلا إنه كمان هيحصل عكس اللي انتي قاصداه وتجفيف فروة شعرك بالشكل ده هيخليها تاخد رد فعل عكسي وتزود انتاج الدهون.
4- دوري على المكونات دي:
- water
- benzoyl peroxide
- selenium sulfide
- sodium sulfacetamide
- Ketoconazole
هل فيه وصفات طبيعية وماسكات للعناية بالشعر الدهني؟
فيه وصفات طبيعية كتيرة مفيدة لفروة الرأس الدهنية ومش بتسبب أضرار للشعر لو خدتي بالك من تعقيم الأدوات اللي هتعملي فيها الوصفة واتأكدتي إن المكونات صالحة ونظيفة، أمثلة على الوصفات دي:
- الشاي الأخضر في العناية بالشعر الدهني
وده ممكن تستخدميه على شعرك وممكن تدوري على شامبو بخلاصة الشاي الأخضر. - عشبة الشيكاكاي ودي عشبة هتلاقيها عند العطار
- اخلطيها بمياه وسيبيها على شعرك لمدة 30 دقيقة.
- وصفة الموز والعسل، اخلطيهم على بعض وسيبيهم على شعرك لمدة 20 وبعدين اغسليه.
- وصفة الألوفيرا بعصير الليمون، معلقة ليمون على فنجان الوفيرا وسيبيه على شعرك بشرط يكون رطب لمدة 30 دقيقة قبل ما تغسليه.
ازاي اعرف إن شعري دهني؟
يعني إيه قشرة دهنية؟
يعني إيه شعر دهني؟
إيه هو الزهم؟
المصادر
قوليلنا رأيك