الطلبات
ليه شعرك جاف و بيتساقط؟هل الحل إنك تزودي المرطب على شعرك؟
أول حل بييجي في بالك لما تحسي إن شعرك بقى جاف، هو إنك تزودي كمية الكريم على شعرك أو تزودي كمية الزيت، وبتستغربي لما بتلاقي بعدها شعرك بدأ يضعف ويقع وينشف أكتر! ومفعول الكريم ده بيفضل لمدة ما بتسرحي شعرك وهو طري بس وبعدها بيروح. فكرتي قبل كده إنك كده بتضري بصيلات شعرك وبتئذي مسام فروة الرأس؟ هل بعد فترة لقيتي القشرة بدأت تظهر؟ كل ده ليه أسباب مهم جداً تعرفيها وتعرفي إن كل سبب ليه طريقة علاج مختلفة.
يعني إيه شعر جاف؟
إيه علاقة إفراز الدهون وجفاف الشعر؟
هل فيه مشاكل في إن الشعر جاف؟
شعرك الجاف بيخليكي تفقدي مظهر جمالي لأنه متقصف وهايش ومطفي، فمهم تهتمي بيه عشان يظهر طري ولامع وناعم. وبعيداً عن المشاكل الجمالية من جفاف الشعر، فهو بيسبب مشاكل في فروة الرأس لأن جفاف الفروة مع الوقت ممكن يتحول لالتهابات وقشرة ومنها بتأدي لضعف الشعر وتكسيره وبعدها تسقاط الشعر.
إيه أسباب جفاف الشعر؟
لما تلاقي إن شعرك جاف وهايش ومتقصف وارد تكون الأسباب وراثية وطبيعية ووارد يكون جفاف شعرك ده هو نتيجة لروتين معين بتعمليه أو أسلوب عناية مش مناسب لطبيعة شعرك الجاف. فمتقلقيش، اعرفي الأسباب و عالجيها ولو جفاف الشعر زاد مهم جداً تستشيري دكتور عشان ميحصلش مضاعفات وتعالجيها بسرعة.
- التغذية وتأثيرها على جفاف الشعر
- عادات غلط بتأثر على جفاف الشعر
- السن وتأثيره على جفاف الشعر
- حالات طبية بتأثر على جفاف الشعر
أي حاجة بتدخل المعدة بتأثر على شعرك بالسلب أو الإيجاب، لأن الشعر بياخد تغذيته من الجسم زيه زي أي عضو تاني. فيه عوامل في التغذية بتأثر بشكل كبير على جفاف وصحة الشعر منها:
– نقص الفينامينات والعناصر الغذائية اللي بيحتاجها الشعر واللي هما تحديداً البروتينات، الزنك، الحديد والبيوتين وده حسب كلام الـ AAD.
– اضطراب الأكل وده ممكن يحصل عن طريق حاجتين: أولاً دايت خلاكي تفقدي وزنك بسرعة. وثانياً: العكس وهو إن فيه شره الطعام. كل دي عوامل بتسبب مشاكل كتيرة منها ضعف الشعر وهيشان الشعر وجفاف الشعر والقشرة والتساقط.
النقطة دي بتشمل الروتين الغلط والمنتجات اللي بتستخدميها والأدوات والتسريحات اللي بتأثر على شعرك و بتسببله جفاف وتقصف وتساقط للشعر الجاف، وأهم العادات دي:
- تختاري شامبو مش مناسب لطبيعة شعرك ولخصلة شعرك.
- إنك تصبغي شعرك كتير أو تختاري نوع صبغة مش موثوقة.
- الفرد الكيميائي المستمر لأن ده بيضر بصيلات الشعر من الجذور ولحد الأطراف.
- استخدام مكواة الشعر والسشوار بشكل كبير.
- استخدام مشط غير مناسب وبيقطع الشعر أو بيسبب ألم لفروة الرأس.
- شد الشعر وتسريحه بشكل قاسي وعمل تسريحات ضيقة زي تسريحة ديل الحصان والضفيرة الصغيرة بشكل مستمر.
تقدم العمر وبعض التغيرات للعوامل الوراثية والتغيرات الهرمونية اللي بتحصل عند البنات بسبب انقطاع الطمث(الدورة الشهرية) كل دي عوامل بتسبب ضعف لشعرك وممكن تسبب جفاف وتساقط الشعر.
وفي الوقت ده جفاف الشعر بيحصل بسبب أكتر من حاجة منهم: إن جسمك بيبدأ يفقد العناصر الطبعية اللي بتحمي شعرك وبتغذيه، وكمان لأن الغدد الدهنية الموجودة في فروة الرأس بتفقد جزء من قدرتها في إفراز الدهون الطبيعية والزيوت المرطبة للشعر.
فيه حالات طبية ومرضية ممكن تكون سبب أساسي في جفاف الشعر وفي الحالة دي من الأفضل تستشيري الدكتور عشان يعالج السبب المرضي وبالتالي هيتعالج جفاف الشعر.والحالات دي زي:
- مشاكل فروة الرأس في إنها مش قادرة تفرز دهون وزيوت طبيعية بشكل مناسب.
- مشاكل في الغدد، بالتحديد قصور في الغدة الدرقية والغدة جار الدرقية ودي حالة لما بتحصل بتسبب مشاكل كتيرة منها جفاف الشعر.
- الإصابة ببعض الأمراض زي القهم العصابي، خلل في الهرمونات، الذئبة، الزهري وبعض أنواع الأورام السرطانية.
- بعض الأدوية والعلاجات بتسبب جفاف الشعر عشان كده وانتي بتستشيري الدكتور بلغيه بالأدوية اللي بتاخديها ولو فيه أمراض صحية بتتعالجي منها.
إيه أسباب تساقط الشعر الجاف؟
ازاي اختار شامبو مناسب للشعر الجاف؟
لو شعرك جاف أو فروة راسك جافة أو متهيجة، اختيارك لنوع شامبو مناسب يعتبر أول خط دفاع ضد مشاكل الشعر الناتجة عن الجفاف زي التهابات فروة الرأس أو القشرة أو تساقط الشعر الجاف.
أهم نصايح وانتي بتختاري شامبو للشعر الجاف
ممكن تدوري على شامبو بخلاصة شجرة الشاي أو المنثول. ولو بتتابعي مع دكتور من الأفضل يرشحلك الشامبو المناسب لطبيعة وخصلة شعرك.
حاولي وانتي بتختاري الشامبو لشعرك تبعدي عن الشامبو اللي فيه كبريتات لأنها بتسبب جفاف كبير لفروة الرأس وجفاف أكتر لشعرك.
دوري على الشامبو اللي هدفه ترطيب وتنعيم
لأنه فيه نسبة زيوت ومرطبات عالية مناسبة لشعرك ودي أنسب حاجة لطبيعة شعرك.
ابعدي عن الشامبو اللي هدفه تكثيف الشعر لأنه بياخد من رطوبة الفروة أكتر ولو شعرك بطبيعته جاف مش هيحقق اللي بتدوري عليه بالعكس.
ازاي أعالج الشعر الجاف واحميه من التساقط؟
كل سبب من الأسباب اللي اتكلمنا عنها ليها علاج مختلف، ومفيش أسباب فيها تعارض مع بعض، يعني لو شعرك بيتساقط بسبب روتين معين بتعمليه وانتي اتغذيتي بشكل سليم مش هتخسري حاجة بالعكس لأنك هتبقي بتحمي شعرك من مشاكل تانية كتير غير التساقط.
لكن من الضروري جداً استشارة دكتور عشان يساعدك في حل المشكلة بعد ما يعرف السبب. لكن هنا هنقوللك على نصايح مهما كان سبب مشكلة جفاف شعرك مش هيحصر أي ضرر أو نتيجة عكسية لو عملتيها.
استشيري الدكتور كل فترة خصوصاً لو معدل تساقط شعرك كان أكبر من حوالي 100 شعرة في اليوم أو لو بدأت تظهر قشرة في شعرك نتيجة جفاف الشعر أو فروة الرأس.
اختاري منتجات عناية بالشعر مناسبة لطبيعة شعرك كشعر جاف وكمان مناسبة لخصلة شعرك.
اختاري شامبو مناسب لشعرك ويساعدك تقللي جفاف الشعر وفروة الرأس.
حافظي على الأكل الصحي والتغذية المناسبة اللي بتمد شعرك بالعناصر اللي محتاجها سواء بروتين أو بيوتين أو فيتامينات أو حديد وزنك.
اشربي كمية مياه مناسبة في فصل الصيف لأنك بتفقدي كمية مياة كبيرة وفي فصل الشتاء لإنك بتنسي تشربي مياه.
ابعدي عن السكريات لإنها بتصعب على الجسم يمتص البروتين بالشكل المناسب للشعر، وابعدي عن والكحولات والمشروبات الغازية والحبوب النشوية المكررة زي المكرونات والمعجنات لإنها بتتحول لسكر بردو في النهاية.
اختاري تسريحات شعر مناسبة لخصلة شعرك وفي نفس الوقت متسببش تساقط للشعر.
اعتني بنظافة شعرك بشكل مستمر عشان ميحصلش تركم للجلد الميت على فروة الرأس وتظهر القشرة والتهابات في فروة الرأس.
استمري على روتين مناسب يساعدك تعتني بشعرك الجاف وتحميه من التساقط.
روتين العناية بالشعر الجاف المتساقط
إيه الفيتامينات اللي بيحتاجها الشعر الجاف لعلاج تساقط الشعر؟
شعرك عشان يبقى حيوي وجميل محتاج فيتامينات معينة ومعادن تغيه بشكل صحي ومناسب، وكل ما حاولتي تلاقي العناصر والفيتامينات دي بشكل طبيعي من غير مواد كيميائية كل ما هتحافظي على عُمر شعرك ويفضل صحي وحيوي فترة أطول. ولو نوع شعرك جاف تحديداً فيه فيتامينات مهمة جداً ليه سواء عشان تهدي فروة الرأس وتحميها من الالتهابات أو بتزود الترطيب لشعرك أو بتقويه من جذوره أو بتساعده يمتص العناصر الغذاية دي بشكل سليم، والفيتامينات دي أهمها: الكولاجين، البيوتين،السيليكا، فيتامين هـ Vitamin E، أوميجا3، الحديد وفيتامين سي Vitamin C.
هل فيه وصفات طبيعية وماسكات للعناية بالشعر الجاف المتساقط؟
الوصفات اللي بتعمليها في بيتك عشان تعتني بشعرك أو ببشرتك كمان مهم تاخدي بالك من كذا حاجة عشان متسببش آثار جانية وتضر شعرك وبشرتك:
- خلي بالك من تعقيم الأدوات اللي هتعملي فيها الماسك أو الوصفة.
- استخدمي مكونات متأكدة من صلاحيتها.
- التزمي على قد ما تقدري بالوقت المناسب للوصفة دي على شعرك
أهم 9 الماسكات للشعر الجاف
- ماسك الألوفيرا والكركدية
- ماسك الموز والكاكاو
- ماسك الموز واللبن الرايب.
- ماسك البيض وزيت الزيتون.
- ماسك البيض والمايونيز
- ماسك الكاري وجوز الهند.
- ماسك زيت جوز الهند والعسل.
- ماسك الحلبة والليمون.
- ماسك العسل واللوز.
ضيفي أول ريڤيو عن “ليه شعرك جاف و بيتساقط؟هل الحل إنك تزودي المرطب على شعرك؟”